"კავკასიური სახლი" ხვალ, თბილისის სახელმწიფო უნივერსიტეტში საჯარო დისკუსიას გამართავს. დისკუსიის თემაა უკრაინაში არსებული შიდა და საგარეო-პოლიტიკური ვითარების ანალიზი.
ღონისძიებაზე მომხსენებელი იქნება პოლიტიკის კვლევების საერთაშორისო ცენტრის საშინაო პოლიტიკის დეპარტამენტის თავმჯდომარე იაროსლავ კოვალჩუკი, რომელიც ისაუბრებს პოლიტიკურ ვითარებაზე უკრაინაში საპრეზიდენტო არჩევნების შემდეგ.
მომხსენებელი იქნება ასევე მსოფლიო პოლიტიკის ინსტიტუტის ბორდის თავმჯდომარე ვიქტორ სლინჩაკი, რომელიც ისაუბრებს თემაზე - რუსეთ-უკრაინის ურთიერთობები ყირიმის ანექსიის და დონბასში განვითარებული უახლესი მოვლენების ფონზე.
დისკუსია რუსულ ენაზე გაიმართება. მასზე დასწრება თავისუფალია. ღონისძიების ორგანიზატორების ცნობით, საჯარო დისკუსია გაიმართება მიმდინარე პროექტის "უკრაინა - გამოსავალი კრიზისიდან დიალოგის გზით" ფარგლებში, რომელიც ხორციელდება დიდი ბრიტანეთის მთავრობის მხარდაჭერით
2014 წელს "კავკასიურმა სახლმა" დაიწყო ახალი პროექტის განხორციელება: უკრაინა გამოსავლის ძიებაში დიალოგის გზით. "კავკასიური სახლის" ინფორმაციით, პროექტს ორი მიზანი აქვს. ერთი მხრივ, უკრაინა-რუსეთის კონფლიქტის ტრანსფორმაციის მხარდაჭერა, საქართველოში უკრაინელი და რუსი საშუალო რანგის ოფიციალური პირების პირისპირ შეხვედრების მეშვეობით; და მეორე მხრივ, უკრაინაში მიმდინარე პოლიტიკური და ეკონომიკური ტრანსფორმაციის მხარდაჭერა საქართველოს გამოცდილების გაზიარების საშუალებით.