ხარების დღესასწაულზე, პატრიარქის მოსაყდრემ მიტროპოლიტმა შიომ, სასულიერო პირებთან ერთად მცხეთა აკურთხა.

როგორც პატრიარქის მოსაყდრემ ქალაქის ქუჩების კურთხევისას განაცხადა, აღნიშნული ტრადიცია მე-11 საუკუნიდან არსებობს.

„მე-11 საუკუნეში პატრიარქმა მელქისედეკმა პირველმა დააარსა მცხეთის კურთხევის დღე ხარების დღესასწაულზე. მრავალი საუკუნე სრულდებოდა ეს წესი, მაგრამ ეგზარქოსების პერიოდში შეწყდა ამ ტრადიციის აღსრულება, რომელიც კათალიკოს-პატრიარქმა ილია მეორემ აღადგინა. დღეს ჩვენ ვასრულებთ ამას, ვაკურთხებთ მცხეთას“, - განაცხადა მიტროპოლიტმა შიომ.

ხარების დღესასწაულთან დაკავშირებით, პატრიარქის მოსაყდრე, მიტროპოლიტმა შიომ, საღმრთო ლიტურგია სვეტიცხოვლის ტაძარში დღეს, 10:00 საათზე, დაიწყო.

წირვაზე დღეს სამი ჯვარი აკურთხეს.