რუსეთის საგარეო საქმეთა სამინისტროს თბილისის აეროპორტში მომწამლავი სითხის გამოყენებით მომხდარი ინციდენტის გარშემო შექმნილი სიტუაცია კონტროლზე ჰყავს აყვანილი. ამის შესახებ „ტასს“ რუსეთის საგარეო საქმეთა მინისტრის მოადგილე გრიგორი კარასინმა განუცხადა.
„შვეიცარიის საელჩოსთან არსებული რუსეთის ინტერესების სექცია აქტიურად მუშაობს ამ საკითხზე. ყურადღებით ვაკვირდებით გამოძიების მსვლელობას. ქართული მხარე ჩვენ საქმის კურსში გვაყენებს, ამიტომ სჯობს, დაველოდოთ შედეგებს“, - განაცხადა დიპლომატმა.
ბრალდებულის მოქალაქეობასთან დაკავშირებით დასმულ კითხვაზე პასუხისას კარასინმა განაცხადა, რომ უახლოეს დღეებში კონსული ბრალდებულს შეხვდება და მისი მოქალაქეობის საკითხი უფრო ნათელი გახდება.
როგორც ცნობილია, 2 ივლისს თბილისის აეროპორტში ადამიანის ჯანმრთელობისთვის საფრთხის შემცველი სითხე დაღვარეს, რის შედეგად რამდენიმე ადამიანი მოიწამლა. ფაქტზე რუსეთის მოქალაქე დიმიტრი ბიკოვი დააკავეს, რომელსაც ბრალის დამტკიცების შემთხვევაში რვა წლამდე თავისუფლების აღკვეთა ელის. ბიკოვი წაყენებულ ბრალს არ აღიარებს.