ამბროლაურში ახალგაზრდა მამაკაცი დ.გ. დაჭრეს. ფაქტს შინაგან საქმეთა სამინისტროში ადასტურებენ და აღნიშნავენ, რომ დაშავებულის მდგომარეობა მძიმე არ არის. როგორც „ინტერპრესნიუსს“ შინაგან საქმეთა სამინისტროში განუცხადეს, გამოძიება სისხლის სამართლის კოდექსის 118-ე მუხლით მიმდინარეობს, რაც ჯანმრთელობის ნაკლებად მძიმე დაზიანებას გულისხმობს და 3 წლამდე თავისუფლების აღკვეთას ითვალისწინებს.

ადგილობრივების ინფორმაციით, შემთხვევა დღეს დილით, ურთიერთშელაპარაკების ნიადაგზე მოხდა და დაზარალებული თავდამსხმელს არ იცნობდა. მათივე ინფორმაციით, სავარაუდო დამნაშავე არ არის ამბროლაურის მცხოვრები.

შსს-ს ცნობით, დანაშაული გახსნილია ცხელ კვალზე. სამართალდამცველების მიერ დამნაშავე პირის ვინაობა ცნობილია. მიმდინარეობს საგამოძიებო ღონისძიებები.