დაისვა არაერთი კითხვა მინისტრობის თითოეულ კანდიდატთან დაკავშირებით და პრემიერმა ყველა კითხვაზე ამომწურავი პასუხი გასცა, - ამის შესახებ საპარლამენტო უმრავლესობის წევრმა, მამუკა მდინარაძემ საპარლამენტო უმრავლესობის და პრემიერის შეხვედრის შემდეგ ჟურნალისტებს განუცხადა. მისივე თქმით, ხვალიდან პარლამენტი კანდიდატების განხილვას დაიწყებს.

"დღეს პრემიერმა წარმოადგინა მინისტრობის კანდიდატები, რომელსაც ხვალ დილით ოფიციალურად გაახმოვანებს. დაისვა არაერთი კითხვა თითოეულ კანდიდატთან დაკავშირებით და პრემიერმა ყველა კითხვაზე გასცა ამომწურავი პასუხი. ხაზი გაესვა რეფორმების აუცილებლობას, ცვლილებების აუცილებლობას, გამოწვევებზე ადეკვატურ პასუხს. საბოლოოდ უმრავლესობამ პრემიერს განახლებული შემადგენლობა დაუდასტურა. ძალიან კარგია, რომ პარლამენტსა და პრემიერს შორის ასეთი ინტენსიური კომუნიკაციაა. პრემიერი ადასტურებს, რომ პარლამენტთან ასეთი ინტენსიური კომუნიკაცია გაგრძელდება", - განაცხადა მამუკა მდინარაძემ.