ქართველი პიანისტი ნიკოლას ნამორაძე 2018 წლის ჰონენსის საერთაშორისო კონკურსის ლაურეატი გახდა. მან ფორტეპიანოსთვის განკუთვნილი მსოფლიოში ყველაზე დიდი ჯილდო - 100 ათასი დოლარი და ხელოვნის განვითარების პროგრამა (500 ათასი დოლარი) მოიგო. ფინალში მან ტაივანელ ჰან ჩენსა და ამერიკელ ლეველინ სანჩეს-ვერნერს აჯობა.
„გასული ორი კვირის მანძილზე ჩვენმა ჟიურიმ და აუდიტორიამ უმაღლესი დონის მსოფლიო კლასის პიანისტებს მოუსმინა. ვულოცავთ ყველა მონაწილეს და განსაკუთრებით მსურს მივულოცო გამარჯვებულს - ნიკოლას ნამორაძეს“, - განაცხადა კონკურსის მხატვრულმა დირექტორმა იონ კიმურა პარკერმა.
26 წლის ნიკოლას ნამორაძე თბილისში დაიბადა, ორი თვის ასაკში კი საცხოვრებლად ოჯახთან ერთად ბუდაპეშტში გადავიდა.