მოსკოვი ყურადღებით აკვირდება საქართველოში წინასაარჩევნოდ შექმნილ პოლიტიკურ ვითარებას და იმედი აქვს, რომ წინასაარჩევნო ატმოსფერო ანტირუსული ხასიათის შემცველი არ იქნება, - ამის შესახებ ჟურნალისტებს რუსეთის საგარეო საქმეთა მინისტრის მოადგილემ გრიგორი კარასინმა რუსეთთან ურთიერთობების საკითხებში საქართველოს პრემიერ–მინისტრის სპეციალურ წარმომადგენელთან ზურაბ აბაშიძესთან შეხვედრამდე განაცხადა.

„ჩვენ ყურადღებით ვაკვირდებით პოლიტიკურ სიტუაციას, რომელშიც საპრეზიდენტო არჩევნები ჩაივლის. იმედი გვაქვს, რომ ის ანტირუსული მიმართულებით არ განვითარდება“, - განაცხადა კარასინმა.

კითხვაზე, რომელ კანდიდატს უჭერს მხარს რუსეთი, კარასინმა აღნიშნა, რომ მოსკოვისთვის „სიმპათიურია ყველა ის პოლიტიკოსი, რომლებიც ქართველ ამომრჩეველს მოსწონს“.