ქართული პრესის მიმოხილვა   02.10.2018

“ივანიშვილმა უნდა აუხსნას საზოგადოებას რაზე საუბრობს ოქუაშვილი” - ხუხაშვილი

"ოცნების" შავი დღე

***

“ივანიშვილმა უნდა აუხსნას საზოგადოებას რაზე საუბრობს ოქუაშვილი” - ხუხაშვილი

“ბიძინა ივანიშვილის ყოფილი მრჩეველი და ანალიტიკოსი გია ხუხაშვილი ბიზნესმენ ზაზა ოქუაშვილის მიერ გაკეთებულ განცხადებებთან დაკავშირებით ამბობს, რომ მისთვის დაუჯერებელია, რომ ივანიშვილი მსგავს გარიგებებსა და მოლაპარაკებებში პირადად ამ ფორმით მონაწილეობას იღებდა. ხუხაშვილი ამბობს, რომ ეს უფრო დიდი ფანტაზიის ნაყოფია, ვიდრე რეალობა“, - წერს გაზეთი "რეზონანსი“ სტატიაში სათაურით, “ივანიშვილმა უნდა აუხსნას საზოგადოებას რაზე საუბრობს ოქუაშვილი” - ხუხაშვილი

"თუმცა ანალიტიკოსი აცხადებს, რომ მსგავსი ჩანაწერების და განცხადებების შემდეგ, ხელისუფლება სირაქლემის პოზაში არ უნდა იდგეს და საზოგადოებას კონკრეტულად უნდა აუხსნას რა მოხდა და ხდება რეალურად. ხუხაშვილი წინასაარჩევნოდ სიტუაციის კიდევ უფრო გართულებას მოელის, ამიტომ მმართველ გუნდს ადეკვატურობისკენ მოუწოდებს. კორესპონდენტის კითხვაზე, როგორ შეაფასებთ ზაზა ოქუაშვილის განცხადებებს ბიძინა ივანიშვილთან მიმართებაში. თქვენ ამ ადამიანს პირადად იცნობთ. გჯერათ, რომ ის ასე პირდაპირ დაიწყებდა ბიზნესმენის დარეკეტებას? ხუხაშვილის თქმით, მისთვის რთულად წარმოსადგენია, რომ მსგავს რეკეტში და ბიზნესმენების დაშანტაჟებაში ბიძინა ივანიშვილი მონაწილეობას იღებდეს. ეს უკვე ყველანაირ ფანტაზიას სცდება. ვიცი როგორი პიროვნებაა და ეს რიტორიკა, რომელზეც ოქრუაშვილი საუბრობს, ვინც ივანიშვილს იცნობს, ძალიან რთული დასაჯერებელია. თუმცა, ის ჩანაწერები რაც ქვეყნდება და რასაც ეს ბიზნესმენი ყვება, გასარკვევი და გამოსაკვლევია. დაუშვებელია, რომ საზოგადოებას ამაზე ადეკვატური და ამომწურავი პასუხი არ გაეცეს. სხვაგვარად მსგავსი განცხადებები ქვეყნის და ხელისუფლების ინტერესებს ძალიან მძიმედ აზიანებს. სირაქლემას პოზაში ჩადგომა და აქედან საზოგადოებასთან საუბარი კარგს არაფერს მოიტანს. იმაზე არ არის საუბარი, ვის რისი გვჯერა“, - აღნიშნავს გამოცემა.

"კორესპონდენტის კითხვაზე, თქვენ თუ გსმენიათ ფარცხალაძის გავლენებზე და რამდენად გჯერათ, რომ ის კვლავ პროკურატურას აკონტროლებს. რატომ შეიძლება ის ამხელა ნდობით სარგებლობდეს? ხუხაშვილის თქმით, მას ამ თემაზე ამაზე ჭორაობა არ სურს. ძალიან ბევრი რამ გამიგია, მაგრამ ამის მტკიცებულებები არ მაქვს. ამიტომ კონკრეტულად სახელებზე და გვარებზე საუბრისგან თავს შევიკავებ. კიდევ გავიმეორებ, რომ ხელისუფლებამ ამ ბრალდებებზე ადეკვატური პასუხი უნდა გასცეს. რას ამბობს ეს კაცი, უნდა გაირკვეს და მათ თავიანთი პოზიცია უნდა დააფიქსირონ. ნება იბოძონ და აუხსნან საზოგადოებას რაზე საუბრობს ოქუაშვილი. რა თქმა უნდა, კარგი იქნება ბიძინა ივანიშვილმა აუხსნას საზოგადოებას რაზეა საუბარი. თუმცა აქ მისი განმარტებები იმდენად არსებითად მნიშვნელოვანი არ იქნება, როგორც გამოძიება და დეტალების გარკვევა. ძალიან ბევრი რამ კითხვის ნიშნებს აჩენს. ჩანაწერებში ნახსენები სახელი და გვარები. მისი გარემოცვა, რომ რაღაცას სწორად არ აკეთებს ამაზე დიდი ხანია მიდის საუბარი. უნდა გაირკვას ერთხელ და სამუდამოდ, მისი სახელით ვინ რას ჩმახავს და მე ამაში დარწმუნებული, ვარ რომ საქმე ამასთან გვაქვს. ასევე, ოქუაშვილს ვინ და რა მიზნებისთვის შეიძლება იყენებდეს. ამ საკითხს პოლიტიკური მანიპულაციებისთვის რომ გამოიყენებენ, ამაში გასკვირი არაფერია. ბუნებრივია, რომ ამ თემას ოპოზიცია, მითუმეტეს წინასაარჩევნოდ დაიხვევს. მთლად მასე არ ვფიქრობ, რომ ოქუაშვილს რამე კონკრეტული პოლიტიკური მიზნები ჰქონდეს. თუმცა არც იმაში ვარ დარწმუნებული, რომ მან ამხელა სკანდალში თავი სამშობლოს სიყვარულის გამო გაჰყო. მას საკუთარი კონკრეტული მიზნები აქვს. მას თავისი ბიზნესი ადარდებს და ვხედავთ, რომ ამისთვის კარგადაც უშრომია. თუმცა, ფარცხალაძის და სარდაფის ეპიზოდი სასწრაფოდ გამოსაკვლევია. ამის ასე უყურადღებოდ დატოვება არ შეიძლება. გამოძიება უნდა დაიწყოს და ყველაფერი დეტალებში გაირკვას. ასევე, ბანკის გადარიცხვები და ამ თანხის გატანა, ამის დადგენა არ იქნება რთული“, - განაგრძობს გამოცემა.

"საზოგადოებას არ აინტერესებს ვინ რას იზამს, არსებობს კითხვები და ამ კითხვებზე პასუხის გაცემაა საჭირო. ნება იბოძონ და როგორც უნდათ ისე გამოიძიონ. ამ ქვეყანაში გასაკვირი არაფერი აღარ არის. წინასაარჩევნოდ ძალიან ბევრი რამე შეიძლება მოხდეს. კი, ბატონო, გახარიამ დაადასტურა რომ შეხვედრა შედგა, რატომ უნდა უარყოს?! ეს არის სწორედ გასარკვევი რაზე შეხვდა ეს ადამიანი ივანიშვილს. ის თავის ერთ ვერსიას ჰყვება და საინტერესოა მეორე მხარის ვერსიაც. აქ ვის რისი გვჯერა, ამაზე საუბარი უკვე აღარ არის. თუმცა, ივანიშვილთან მიმართებაში ასეთი რიტორიკა ჩემთვის დაუჯერებელია. მას ვინც იცნობს ყველამ კარგად იცის, რომ ის ასეთ საუბრებში წარმოუდგენელია, რომ შევიდეს. მითუმეტეს იქ რაღაც მის ტონზე და ყვირილზე იყო საუბარი. არ ვიცი რა გითხრათ, ეს მაინც დიდი ფანტაზიის ნაყოფი მგონია“, - წერს სტატიის ავტორი.

"ოცნების" შავი დღე

„მოსთხოვა თუ არა ბიძინა ივანიშვილმა ბიზნესმენ ზაზა ოქუაშვილს 4 მილიონი "ბიჭების დასაფინანსებლად"; ნაცემი და შიშველი ლევან ყიფიანი სარდაფში გამოკეტა თუ არა ყოფილმა მთავარმა პროკურორმა ოთარ ფარცხალაძემ - სკანდალურ ჩანაწერებს ბოლო არ უჩანს და ამ ძალიან მძიმე ბრალდებებით შეხვდა "ქართული ოცნება" 1-ელ ოქტომბერს - არჩევნებში გამარჯვებისა და ხელისუფლებაში მოსვლის მე-6 წლის იუბილეს. გუშინ ბრალდების თითქმის ყველა ადრესატმა გააკეთა კომენტარი, რომ ოქუაშვილის განცხადება სიმართლე არ არის, მხოლოდ ოთარ ფარცხალაძე დუმს, როგორც ყოველთვის და ასევე არ გამოჩენილა ლევან ყიფიანიც, თუმცა მისმა ადვოკატმა შალვა ხაჭაპურიძემ თქვა, რომ "უახლოეს დღეებში ბატონი ლევანი ამ საკითხებთან დაკავშირებით გააკეთებს საგანგებო და ფრიად მნიშვნელოვან განცხადებას", - წერს გაზეთი "რეზონანსი“ სტატიაში სათაურით, "ოცნების" შავი დღე / ხელისუფლებაში მოსვლის მე-6 წლის იუბილეს "ოცნება" ბიზნესრეკეტზე სკანდალური ბრალდებით ხვდება

"ახლა ყველაზე მნიშვნელოვანია, ყიფიანი დაადასტურებს თუ უარყოფს იმ ფაქტს, რომ ფარცხალაძემ ის სარდაფში ნაცემი გამოკეტა და ავთენტიკურია თუ არა გავრცელებული ჩანაწერები, სადაც ბიზნესმენ ოქუაშვილს სთხოვენ ფულს. ასევე მოლოდინია, რომ შესაძლოა, ივანიშვილსა და ოქუაშვილს შორის შეხვედრისა და 4 მილიონის მოთხოვნის ჩანაწერიც გავრცელდეს, რადგან ოქუაშვილმა ირიბად უკვე დაადასტურა ის, რომ ეს ჩანაწერიც არსებობს. არის თუ არა ავთენტიკური ჩანაწერები - პროკურატურა აცხადებს, რომ გამოძიება პირველი აუდიოჩანაწერის გავრცელების საფუძველზე უკვე დაწყებულია და ყველა შემდეგი საჯარო ჩანაწერი მიმდინარე გამოძიების საქმის მასალებს დაერთვება, თუმცა ავთენტიკურობა ჯერ დადასტურებული არ არის. სკანდალურ ჩანაწერებს გუშინ დიდი ხმაური მოჰყვა. 13-მა არასამთავრობო ორგანიზაციამ საგანგებო ბრიფინგზე განაცხადა, რომ ქვეყანა ღრმა კრიზისშია, ელიტური კორუფციის ცხადი ნიშნები არსებობს და არავის აქვს მოლოდინი, რომ საქმე გამოძიებული იქნება, ამიტომაც არასამთავრობოები სიტუაციის საერთაშორისო ორგანიზაციებისათვის გაცნობას გეგმავენ. არასამთავრობოები ბიზნესმენებსაც მოუწოდებენ, რომ თუკი შანტაჟი მათზეც განხორციელდა, ინფორმაცია გაასაჯაროონ“, - აღნიშნავს გამოცემა.

"მწვავე იყო ოპოზიციის შეფასებებიც. ოპოზიცია ამბობს, რომ ქვეყანა მაფიის პრინციპით იმართება და ეს კრიმინალური ხელისუფლება უნდა დასრულდეს. გაკეთდა მოწოდება, რომ აღიძრას სს-ის საქმე ყველა ჩანაწერზე ცალ-ცალკე და დაიკითხოს ამ ჩანაწერის ყველა ფიგურანტი, მათ შორის - ივანიშვილიც და გახარიაც, პარალელურად კი ვადამდელი არჩევნების მოთხოვნაც გაისმა. "ოცნების" წარმომადგენლები, როგორც მოსალოდნელი იყო, სახელმწიფო რეკეტზე ბრალდებებს "გაუგებარსა" და "დადგმულ სპექტაკლს" უწოდებენ. "ოცნებაში" თვლიან, რომ ოქუაშვილის შეთხზული ამბის გამო ივანიშვილის პროკურატურაში დაბარების საფუძველი არ არსებობს. პარლამენტის თავმჯდომარე ირაკლი კობახიძე აცხადებს, რომ ოქუაშვილი აბსურდული ჩანაწერების გავრცელებით ცდილობს, ჩრდილი მიაყენოს ხელისუფლებას, თუმცა, მიუხედავად იმისა, რომ თურმე ყველაფერს იწერდა, არც ერთი მტკიცებულება არ არსებობს, რომელიც ხელისუფლების მხრიდან ბიზნესზე ზეწოლის ფაქტს დაადასტურებს. პრემიერ-მინისტრის თქმით კი, ოქუაშვილის განცხადება ანეკდოტების სიაში შევა და რა გამწვავებასაც არ უნდა ცდილობდეს ის, ბიზნესმენი თავს ვერ აარიდებს იმ გადასახადებს, რომლებიც მის კომპანიას აქვს დაგროვილი. ამასთან, ეკა ბესელიას მტკიცებით, მთავარი არა შინაარსი, არამედ იმის დადგენაა, როგორ მოხდა ჩანაწერების მოპოვება, რადგან, მისი განმარტებით, უკანონო ჩანაწერების მოპოვება-გავრცელება კანონით ისჯება“, - განაგრძობს გამოცემა.

"განცხადება გააკეთა მთავარმა ადრესატმა ბიძინა ივანიშვილმა, რომელმაც დაადასტურა, რომ მას ოქუაშვილთან შეხვედრა მართლაც ჰქონდა, თუმცა - მხოლოდ პრობლემების მოგვარებისთვის და მას არანაირი თანხა არ მოუთხოვია, როგორც ამას თავად ბიზნესმენი ამბობს. ივანიშვილმა "ოცნების" წევრებს ერთგვარი დავალებაც მისცა, როდესაც ოქუაშვილზე კითხვებს დაუსვამენ, ივანიშვილთან შეხვედრის დამადასტურებელი ჩანაწერის წარდგენა მოითხოვონ."ჩანაწერის ოსტატი ყოფილა ეს კაცი... ყველას იწერდნენ და გამოიტანოს ეს ჩანაწერებიც და გვაჩვენოს ამ საუბრისა და შეხვედრის შესახებ", - განაცხადა ივანიშვილმა. ივანიშვილისა და ოქუაშვილის შეხვედრა და იქ ყოფნა ასევე დაადასტურა გიორგი გახარიამაც და მანაც იგივე მიზეზი დაასახელა, რაც ივანიშვილმა - დახმარების სურვილი. გარდა ამისა, შს მინისტრმა თქვა, რომ ის გასცემს პასუხს კითხვებზე ყველგან - თბილისშიც, ლონდონშიც და ბომბეიშიც, ხოლო ოქუაშვილს მოუწევს თითო თეთრის გადახდა იმ ვალიდან, რაც აქვს. მას შემდეგ, რაც "ომეგა ჯგუფის" ფინანსური პრობლემები გახმაურდა, არაერთი სკანდალური ჩანაწერი გავრცელდა, თუმცა გასულ კვირას "რუსთავი 2"-ის მიერ გავრცელებული ჩანაწერი და თავად "ომეგა ჯგუფის" მფლობელის, ზაზა ოქუაშვილის ინტერვიუ ყველაზე სკანდალური აღმოჩნდა. ოქუაშვილის მიერ მოყოლილი ბიზნესრეკეტის ისტორია ასეთია: ოქუაშვილს 4 მილიონის მიტანა პირადად ბიძინა ივანიშვილმა მოსთხოვა შეხვედრაზე, რომელსაც იმ დროს ბიზნესომბუდსმენი გიორგი გახარია და სპორტის ყოფილი მინისტრი ლევან ყიფიანი ესწრებოდნენ. "ივანიშვილი იძულებული გახდა, რომ თვითონ ეთქვა, ჯერ ვერ მივხვდი, მაჩვენებდა ოთხ თითს, მერე იკადრა და გამოთქვა, რომ 4 მილიონი უნდა მისულიყო ბიჭებთან, რომლებიც შრომობენ, წვალობენ. "ბიჭები" თვითონ იყო რეალურად", - აცხადებს ოქუაშვილი“, - განაგრძობს გამოცემა.

"ამ შეხვედრის შემდეგ ოქუაშვილმა ოფშორში დაარეგისტრირა კომპანია, დანიშნა დირექტორები და წინა დღით შექმნილ ფირმაში გადარიცხა 4 მილიონი. გადარიცხვიდან მეორე დღეს ფული კომპანიის დირექტორად დანიშნულმა პირმა და ლევან ყიფიანმა გაიტანეს "თი-ბი-სი" ბანკიდან, თანაც დარღვევით, ერთი, რომ სამუშაო საათების დასრულების შემდეგ მოხდა თანხის გატანა და მეორეც, დარეგისტრირებიდან 3 თვეზე მცირე დროში დიდი თანხის განაღდებას ფირმის სადამფუძნებლო დოკუმენტის გარეშე კანონი კრძალავს. თუმცა, როგორც ოქუაშვილი ამბობს, გახარიას მხრიდან დიდი ზეწოლის შემდეგ ბანკის მმართველებმა მამუკა ხაზარაძემ და ვახტანგ ბუცხრიკიძემ თანხის განაღდებაზე თანხმობა თქვეს. ამასთან, ოქუაშვილის თქმით, თავიდან მასთან მოლაპარაკებებს ოთარ ფარცხალაძე აწარმოებდა. შეხვედრაც ჰქონდა საბურთალოს ბაზართან ფარცხალაძესა და ყიფიანთან, სადაც ფარცხალაძემ უთხრა, რომ ივანიშვილისა და უჩა მამაცაშვილის დავალებით იყო მისული და ოქუაშვილს 4 მილიონი უნდა გადაეხადა, რისი გადახდაც მან არ ისურვა. ამ შეხვედრის შემდეგ ლევან ყიფიანი საქმის გასარკვევად იმდროინდელ პრემიერ გიორგი კვირიკაშვილთან წავიდა. კვირიკაშვილთან საქმის გარკვევის გამო, "ზედმეტი სიარულისთვის" ფარცხალაძემ, ივანიშვილის დავალებით, ლევან ყიფიანი დასაჯა - სარდაფში ჩააგდო, გააშიშვლა, რამდენიმე საათი სცემდა და გაუპატიურებით დაემუქრა. სწორედ ამის შემდეგ საქმეში პირადად ივანიშვილი ჩაერთო და მოითხოვა 4 მილიონი. მისივე განცხადებით, პარალელურად გრძელდებოდა ლევან ყიფიანისაგან მუქარა "ომეგა ჯგუფის" ჰოლდინგში შემავალი კომპანიების დირექტორებთან. როგორც ოქუაშვილი აცხადებს, ივანიშვილი მას "პატრიოტთა ალიანსის" დაფინანსებასაც სთხოვდა. გარდა ამისა, ოქუაშვილი ინტერვიუში ვანო ჩხარტიშვილზეც საუბრობს. ამბობს, რომ სწორედ ჩხარტიშვილმა დაარწმუნა, ფარცხალაძეს შეხვედროდა და ჩხარტიშვილი და გახარია ივანიშვილის დავალებებს ასრულებენ“, - დასძენს გამოცემა.

"ბიზნესმენი მიანიშნებს, რომ არსებობს ჩანაწერები, სადაც მოქმედი პირი თავად ბიძინა ივანიშვილია. ბიზნესმენ ვანო ჩხარტიშვილის ადვოკატი ზაზა ხატიაშვილი ბრალდებების საპაუხოდ ამბობს, რომ ლონდონის ერთ-ერთმა საუკეთესო საექსპერტო ბიურომ დადო დასკვნა, რომ ტელეკომპანიების - "იბერიისა" და "რუსთავი 2"-ის ეთერში ვანო ჩხარტიშვილის შესახებ გავრცელებული ყველა ჩანაწერი მონტაჟია. ბრალდებაზე საპასუხო განცხადება გაავრცელა "თი-ბი-სი" ბანკმაც. მასში ნათქვამია, რომ ოქუაშვილის განცხადება არ შეესაბამება სიმართლეს და წარმოადგენს მცდარი ინფორმაციის გავრცელების მცდელობას. ბანკი განმარტავს, რომ ყველა ტრანზაქცია სრულდება სამუშაო საათებში, კლიენტის ანგარიშების გახსნისა და წარმოების ყველა წესის დაცვით და ბანკის მხრიდან დაუშვებელია კონკრეტული ტრანზაქციისა და კლიენტის შესახებ დეტალების გასაჯაროება. ბანკი ასევე აცხადებს, რომ "მიმართავს ყველა სამართლებრივ ზომას აღნიშნული ცრუ ინფორმაციის მასშტაბირების საპასუხოდ". ბანკის მხრიდან ფაქტის უარყოფის პარალელურად, "რუსთავი 2" ავრცელებს "თი-ბი-სი ბანკის" მარჯანიშვილის ფილიალთან გადაღებულ ფოტოებს, როგორ დებს ერთი ადამიანი სპორტულ ჩანთას შავ ჯიპში. "რუსთავი 2"-ის ინფორმაციით, ეს სწორედ ის დღეა, როდესაც, ოქუაშვილის თქმით, მისი კუთვნილი თანხა ბანკიდან გამოიტანეს. მეორე ფოტოზე ჩანს ბანკის მოსაცდელში მსხდომი ლევან ყიფიანი და კიდევ ერთი პირი - ალექსანდრე ხაჩიშვილი, რომელიც "კურიერთან" საუბარში ადასტურებს, რომ სწორედ მის სახელზეც იყო დარეგისტრირებული კომპანია და ყოფიანთან ერთად სწორედ მან გაიტანა "თიბისი" ბანკიდან 2 ტრანშით და შავ ჯიპში ჩადო "ომეგა ჯგუფის" მიერ ჩარიცხული მილიონები. ხაჩიშვილის თქმით, თანხის გაცემამდე ლევან ყიფიანი სისტემატურად უკავშირდებოდა ოთარ ფარცხალაძეს, რომ 7-ის ნახევარზე ბანკში ბუცხრიკიძე და ხაზარაძე მოდიან და ამის შემდეგ მათ ფული გადასცეს. ის, რომ მილიონი დოლარის ბანკიდან გატანაში პირადად ოთარ ფარცხალაძე იყო ჩართული, სატელეფონო საუბრის ამონაწერითაც დასტურდება. ბანკიდან ფულის გატანის დღეებში ყიფიანმა და ფარცხალაძემ 12-ჯერ ისაუბრეს. სატელეფონო ზარები ზუსტად იმ დროს არის განხორციელებული, როდესაც ზეწოლის ქვეშ მყოფი "ომეგა ჯგუფის" თანამშრომლები ბანკის შენობაში იცდიდნენ. გარდა ამისა, "რუსთავი 2"-მა გუშინ გაავრცელა ჩანაწერი, სადაც ლევან ყიფიანი ტელეფონზე "ომეგა ჯგუფის" წარმომადგენელს უყვება ფარცხალაძეთან კონფლიქტის შესახებ. მართალია, ყიფიანი გვარს არ ახსენებს, მაგრამ ამბობს, რომ სისხლიანი არის, იმიტომ რომ, შეაგინა და კონფლიქტი მოუვიდა კაცთან, რომელიც ჯერ ძველი ბიჭი იყო, შემდეგ - პროკურორი“, - წერს სტატიის ავტორი.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს