პარლამენტის იურიდიულ საკითხთა კომიტეტი ფრაქცია „საქართველოს პატრიოტების“ მიერ მომზადებულ რეზოლუციას იხილავს, რომელიც „ნაციონალური მოძრაობის“ მმართველობის დანაშაულებრივ რეჟიმად გამოცხადებას და წინა ხელისუფლების მაღალი თანამდებობის პირების სამართლებრივ პასუხისმგებლობაში მიცემას ითვალისწინებს.
რეზოლუციის პროექტს კომიტეტის წევრებს, პარლამენტის ვიცე-სპიკერი ირმა ინაშვილი აცნობს. როგორც ინაშვილმა კომიტეტის სხდომაზე აღნიშნა, ქვეყანაში მიმდინარეობს ფარული სამოქალაქო დაპირისპირება და ეს პროცესი მანამდე გაგრძელდება, ვიდრე სააკაშვილ-ბოკერიას მმართველობას სამართლებრივი შეფასება არ მიეცემა. ინაშვილმა ისიც განაცხადა, რომ „მოწინააღმდეგე ბრძოლის ხაზიდან გაქცეულია“, რადგან რეზულუციის საკომიტეტო განხილვას „ნაციონალური მოძრაობის“ და „ევროპული საქართველოს“ არც ერთი წარმომადგენელი არ ესწრება.
აღსანიშნავია, რომ კომიტეტის სხდომაზე მოწვეულია მთავარი პროკურატურის პროკურორი ირაკლი ნადარეიშვილი. ნადარეიშვილი პროკურატურაში სწორედ იმ დეპარტამენტს ხელმძღვანელობს, რომელიც წინა ხელისუფლების დროს სამართალწარმოების პროცესში ჩადენილ დანაშაულებს იძიებს.