აუდიტის სამსახური ექიმების მიერ სალომე ზურაბიშვილისთვის განხორციელებული შემოწირულების საკითხს შეისწავლის და ამასთან დაკავშირებით სასამართლოსაც მიმართავს
სახელმწიფო აუდიტის სამსახური იმ ექიმების მიერ განხორციელებულ შემოწირულების საკითხს შეისწავლის, რომლებმაც მმართველი გუნდის მიერ მხარდაჭერილ პრეზიდენტობის კანდიდატ სალომე ზურაბიშვილს მსხვილი თანხები შესწირეს.
„ინტერპრესნიუსთან“ საუბრისას აუდიტის სამსახურში ის პროცედურები განმარტეს, რაც კანონმდებლობითაა გაწერილი.
„შესწავლა დაიწყება, აუდიტის სამსახური დადგენილი პროცედურების შესაბამისად იმოქმედებს - მიმართავს სასამართლოს, რათა შეისწავლოს შემომწირველთა შემოსავლები და საბანკო ტრანზაქციები“, - განაცხადეს აუდიტის სამსახურში.
აღსანიშნავია, რომ ექიმების მიერ განხორციელებულ შემოწირულებასთან დაკავშირებით შეკითხვები აქვთ არასამთავრობო სექტორში. არასამთავრობოები სახელმწიფო აუდიტის სამსახურისთვის ოფიციალური განცხადებით მიმართვასაც გეგმავენ იმის თაობაზე, რომ მათ მიერ განხორციელებული შემოწირულების საკითხის შესწავლა დაიწყოს.
შეგახსენებთ, რომ ოქტომბერში, სალომე ზურაბიშვილის სასარგებლოდ განხორციელებული მსხვილი შემომწირველების გარკვეული ნაწილი ექიმებია.
