სამხრეთ საფრანგეთში ოდის დეპარტამენტში წყალდიდობის შედეგად დაღუპულთა რიცხვი 13 ადამიანამდე გაიზარდა.
ამის შესახებ ინფორმაციას ტელეარხი BFMTV საფრანგეთის შს სამინისტროზე დაყრდნობით ავრცელებს.
შეგახსენებთ, რომ აქამდე საუბარი იყო ექვს დაღუპულზე. გარდა ამისა, მძიმედ დაშავებულია ხუთი ადამიანი, ხოლო ერთი კი უგზო-უკვლოდ დაკარგულად მიიჩნევა.
ოდის დეპარტამენტის პრეფექტურაში ასევე განაცხადეს, რომ პეზანის კომუნიდან ათასი ადამიანია ევაკუირებული დამბის გარღვევის რისკის გამო.
ასევე ოდისა და ეროს დეპარტამენტებში დაახლოებით რვა ათასი ადამიანი ელექტროენერგიის გარეშე დარჩა.
სტიქიის შედეგების ლიკვიდირებაში ასობით მაშველი და ჟანდარმი მონაწილეობს.