საქართველო ცივილიზაციის, კულტურული მრავალფეროვნების და მემკვიდრეობის მქონე ქვეყანაა, რომელიც ამავე დროს განთქმულია უძველესი სპორტული ტრადიციებით, - ამის შესახებ საქართველოს პრემიერ-მინისტრმა მამუკა ბახტაძემ სასტუმრო „ბილტმორში", ევროპის საბჭოს სპორტის მინისტერიალის გახსნაზე განაცხადა. მისი თქმით, საქართველოსთვის დიდი პატივია თბილისში უმასპინძლოს ევროპის საბჭოს სპორტზე პასუხისმგებელი მინისტრების მე-15 საიუბილეო კონფერენციას.

„საქართველო გეოგრაფიული, პოლიტიკური, კულტურული თუ ღირებულებითი თვალსაზრისით ევროპის განუყოფელი ნაწილია. ევროპული ინტეგრაციის გზაზე ჩვენი მხარდამჭერია ევროპის საბჭო, რომელთან თანამშრომლობა რამდენიმე ათეულ წელს ითვლის. 1999 წლიდან დღემდე თანამშრომლობა საქართველოსა და ევროპის საბჭოს შორის კიდევ უფრო გაღრმავდა, მათ შორის მნიშვნელოვან ადგილს იკავებს სპორტის სფერო",- განაცხადა ბახტაძემ.

მისივე თქმით, 21-ე საუკუნეში, სპორტი თანამედროვე ადამიანის ცხოვრების განუყოფელი ნაწილი გახდა.

„პირდაპირ თუ ირიბად, სპორტის სფერო უფრო და უფრო უახლოვდება საზოგადოების ცნობიერებასა და ყოველდღიურობას. მას როგორც უნივერსალურ საშუალებას ენიჭება სოციალური, ეკონომიკური, საგანმანთლებლო და კულტურული მნიშვნელობა. არაერთი კვლევის შედეგი ცხადყოფს, რომ სპორტი ევროპული ინტეგრაციის პროცესის მძლავრი ინსტრუმენტი გახდა. მისასალმებელია, რომ სახელმწიფო უწყებები, საერთაშორისო ორგანიზაციები, ტრანსნაციონალური კორპორაციები თუ არასამთავრობო ორგანიზაციები მნიშვნელოვნად ზრდიან თავიანთ კონტრიბუციას სპორტის სფეროში, მათ შორის არის ჩვენი ქვეყანა. დარწმუნებული ვარ, რომ დღევანდელი კონფერენცია გამოიღებს ნაყოფიერ შედეგს",- აღნიშნა ბახტახემ.