გიორგი გახარია - გვეძახდნენ, რომ მირზა სუბელიანს ვერ დავიჭერდით, მაგრამ ის დღეს პატიმარია და რამდენსაც სასამართლო გადაწყვეტს, იმდენი იქნება სასჯელი
გვეძახდნენ, რომ მირზა სუბელიანს ვერ დავიჭერდით, მაგრამ ის დღეს პატიმარია, - ამის შესახებ ვიცე-პრემიერმა, შინაგან საქმეთა მინისტრმა გიორგი გახარიამ განაცხადა.
„ასე გვეძახდნენ ზუსტად, რომ მირზა სუბელიანს ვერ დავიჭერდით, მაგრამ ის დღეს არის პატიმარი და რამდენსაც გადაწყვეტს ქართული სასამართლო, ზუსტად იმდენი იქნება სასჯელი“, - განაცხადა გახარიამ.
ჟურნალისტის რეპლიკაზე, რომ შს სამინისტრო დაკითხვამდე ვერ იჭერდა მირზა სუბელიანს, გახარიამ უპასუხა - „არ გადამრიოთ“.
„მირზა სუბელიანის დაკითხვის საფუძველი გახდა ჩვენება ბოლო სასამართლო პროცესზე, როდესაც მოწმეებმა, რომლებიც იყენებდნენ დუმილის უფლებას, საერთოდ ახსენეს ეს სახელი. არ მინდა ამ დეტალებში წავიდე, რადგან შს სამინისტრო არის პოლიტიკურად აბსოლუტურად ნეიტრალური ინსტიტუტი, დღეს მე არ მაქვს არანაირი უფლება და სურვილი, დეტალებში ვისაუბრო ამ საკითხზე, რადგან ეს ყველაფერი პოლიტიკურ კონტექსტში ხდება. ამ ყველაფერს გაეცემა როგორც სამართლებრივი, ისე პოლიტიკური პასუხი მას შემდეგ, რაც შს სამინისტრო სახელმწიფოსთან ერთად ჩაატარებს მშვიდ, უსაფრთხო გარემოში არჩევნებს“, - განაცხადა გიორგი გახარიამ.
