ის, რაც გუშინ მოვისმინე, პროკურატურას ეს საქმე წაგებული აქვს, - ამის შესახებ „პალიტრანიუსის“ გადაცემაში „360 გრადუსი“ ბადრი პატარკაციშვილის თანამებრძოლმა, ადვოკატმა შალვა ხაჭაპურიძემ განაცხადა.
მისი თქმით, უშუალოდ ბადრი პატარკაციშვილსაც არაერთი ინფორმაცია ჰქონდა, რომ მისი მკვლელობა იგეგმებოდა, რისი სატელევიზიო არქივიც არსებობს. თუმცა, ხაჭაპურიძის განცხადებით, მნიშვნელოვანია საფუძვლიანად მოხდეს საქმის შესწავლა და პროკურატურა არ დაჯერდეს მხოლოდ იმ ჩანაწერებს, რაც საგამოძიებო უწყებამ გაასაჯაროვა.
შალვა ხაჭაპურიძის თქმით, მნიშვნელოვანია მოხდეს როგორც სატელევიზიო არქივის ამოღება, ასევე პატარკაციშვილის შტაბის წევრების და მისი თანაგუნდელების გამოკითხვა.
„ის, რაც გუშინ მოვისმინე, რომ წარმოვიდგინე სასამართლო დარბაზში გაჟღერებული, წაგებული აქვს პროკურატურას ეს საქმე. თუ 2016 წელს ეს ინფორმაცია მიიღე, მე არ უნდა დამიძახო?! შტაბის წევრებს არ უნდა დაუძახო?!“, - აღნიშნა შალვა ხაჭაპურიძემ.
შეგახსენებთ, რომ პროკურატურამ ბადრი პატარკაციშვილის მკვლელობის მომზადების საქმესთან დაკავშირებით ორი აუდიოჩანაწერი გაასაჯაროვა. პროკურატურის მიერ გამოქვეყნებული ინფორმაციის თანახმად, პირველ აუდიოჩანაწერში კუდ-ის მაღალჩინოსანი გიორგი დგებუაძე („მასტერა“) ბადრი პატარკაციშვილის დაცვის თანამშრომელს ესაუბრება და მის გადაბირებას ცდილობს. კერძოდ, ჩანაწერის მიხედვით, დგებუაძე ეუბნება დაცვის თანამშრომელს, რომ ეს საქმე, რომელიც სააკაშვილის დონეზეა გადაწყვეტილი, აუცილებლად განხორციელდება. დგებუაძე ინტერესდება ვინ არიან მზარეულები და როგორია დაცვის სისტემა.