ანრი ოხანაშვილი - ფარცხალაძის და თორდიას ინციდენტი არის საკითხი, რომელიც უნდა იყოს გამოძიებული და რომელზეც სამწუხაროდ, არ გვაქვს პასუხები
ფარცხალაძის და თორდიას ინციდენტი არის საკითხი, რომელიც უნდა იყოს გამოძიებული და რომელზეც სამწუხაროდ, არ გვაქვს პასუხები, - ამის შესახებ „პალიტრანიუსის“ გადაცემაში „7VS1” საპარლამენტო უმრავლესობის წევრმა, ანრი ოხანაშვილმა განაცხადა. ამასთან, ოხანაშვილი აღნიშნავს, რომ მიუხედავად ამ ინციდენტისა, მას არ სჯერა, რომ ფარცხალაძეს შეიარაღებული დაჯგუფება ჰყავს.
„ჩემთვის ფარცხალაძე არის ყოფილი მთავარი პროკურორი, რომელიც ახლა ეწევა რაღაც გარკვეულ საქმიანობას. დანარჩენი ის ბრალდება ჩემთვის არის აღქმადობას მოკლებული, რაც საზოგადოებაში არსებობს. სად შეიძლება იყოს ასეთი დაჯგუფებები მაშინ მითხარით? ფარცხალაძის და თორდიას საკითხი, აუცილებლად უნდა იყოს გამოკვლეული და გარკვეული და ეს არის პრობლემა, რომ ეს ჯერ არ არის გარკვეული. არავის არ უნდა დარჩეს იმის შეგრძნება, რომ ვინმემ შეიძლება გაბედოს და ასეთი მაღალი თანამდებობის პირს, ასეთი ფორმით, მიაყენოს შეურაცხყოფა. ეს არის საკითხი რომელიც უნდა იყოს გამოძიებული და რომელზეც სამწუხაროდ არ გვაქვს პასუხები. მე ვიცი რომ ტყუილია, რომ ვითომ ვიღაცას ჰყავს რაღაც დაჯგუფება“, - განაცხადა ანრი ოხანაშვილმა.
