რამდენიმე წუთის წინ საპატიმრო დატოვეს აჩო ხაჩიძემ და დავით გაბუნიამ, - ამის შესახებ პოლიტიკური პარტია „გირჩი“ „ფეისბუქის“ საკუთარ გვერდზე წერს.

„და ბოლოს, დადგა მომენტი, როცა ყველანი თავისუფლები ვართ.

რამდენიმე წუთის წინ საპატიმრო დატოვეს აჩო ხაჩიძემ და დავით გაბუნიამ.

მადლობა შინაგან საქმეთა სამინისტრო / Ministry of Internal Affairs of Georgia ს, რომ დღეს ყველანი საკუთარ სახლებში დავიძინებთ“, - ნათქვამია „გირჩის“ მიერ გავრცელებულ ინფორმაციაში.

სამართალდამცველებმა მარიხუანას ფესტივალთან დაკავშირებით მიმდინარე გამოძიების ფარგლებში, საგამოძიებო მოქმედება - ჩხრეკის ჩასატარებლად პოლიციის დაწესებულებაში გადაიყვანეს ფესტივალის მონაწილე 8 პირი. აღნიშნულ პირებს, გადაუდებელი აუცილებლობის საფუძველზე, ჩაუტარდათ ჩხრეკა და გამოკითხვის შემდეგ დატოვეს პოლიციის დაწესებულება. ჩხრეკის შედეგად ორი პირისგან ამოღებული იქნა მცირე ოდენობით სავარაუდოდ ნარკოტიკული საშუალება მარიხუანა, რომელსაც უტარდება შესაბამისი ექსპერტიზა.

სამართალდამცველებმა, ასევე წვრილმანი ხულიგნობის და პოლიციის მიმართ წინააღმდეგობისთვის ადმინისტრაციულ სამართალდარღვევათა კოდექსის 166-ე და 173-ე მუხლებით, დააკავეს 6 პირი.