პარტია “თავისუფლების” ლიდერი კონსტანტინე გამსახურდია დეპუტატის მანდატის აღდგენასთან დაკავშირებით პარლამენტის თავმჯდომარეს განაცხადით სავარაუდოდ დღეს მიმართავს.

ამის შესახებ “ინტერპრესნიუსს” პარტია “თავისუფლებაში” განუცხადეს.

;პარლამენტის რეგლამენტის თანახმად, რომელშიც შესაბამისი ცვლილება ძალაში 6 ოქტომბერს შევიდა, პარლამენტის თავმჯდომარის სახელზე დაწერილი განცხადება 3 დღის ვადაში განსახილველად საპროცედურო საკითხთა საპარლამენტო კომიტეტს გადაეგზავნება.

საპროცედურო საკითხთა კომიტეტი საკითხს ერთი კვირის ვადაში განიხილავს და სათანადო დასკვნას პარლამენტის ბიუროს წარუდგენს. ბიუროს კი პარლამენტის წევრის უფლებამოსილების ცნობის საკითხი უახლოესი პლენარული სხდომის დღის წესრიგში შეაქვს.

შესაბამისად, რადგან მომავალი კვირა პარლამენტში საკომიტეტოა, კონსტანტინე გამსახურდიას მანდატის აღდგენა შესაძლებელია უახლოეს სასესიო კვირის პლენარულ; სხდომაზე მოესწროს.