ცოტნე დადიანის ქუჩაზე ახალი კულტურის ცენტრი _ "თბილისი არტ-ჰოლი" გაიხსნა.

ახალი კულტურის ცენტრი თბილისის მერმა გიგი უგულავამ და "საქართველოს ვაგონმშენებელთა ჰოლდინგის" დამფუძნებელმა ირაკლი წილოსანმა გახსნეს.

`თბილისი არტ-ჰოლს" მიზანი, ქართული ხელოვნების პოპულარიზაციაა, კულტურის ცენტრში ყოველდღიურად 500 ბავშვი ქორეოგრაფიას, ხალხურ და თანამედროვე შემოქმედებას, ხელოვნების სხვადასხვა დარგებს დაეუფლება. `თბილისი არტ-ჰოლში" საიუბილეო და სალონური საღამოები და ახალგაზრდა შემოქმედების დათვალიერება-ფესტივალებიც ჩატარდება.

ცენტრის რეაბილიტაცია `საქართველოს ვაგონმშენებელთა ჰოლდინგმა~ განახორციელა. ხუთსართულიანი შენობის სარემონტო სამუშაოები ერთი წლის განმავლობაში მიმდინარეობდა. ცენტრში 500-ადგილიანი თეატრის, კინოს, ქორწინების, სამხატვრო გამოფენის, სპორტულ-გამაჯანსაღებელი და სხვადასხვა დანიშნულების დარბაზებია განთავსებული, რომლებიც ყველა საჭირო ინფრასტრუქტურითაა აღჭურვილი. "თბილისი არტ-ჰოლში" ასამდე ახალი სამუშაო ადგილი შეიქმნა.