საქართველოს ჭიდაობის ფედერაციის პრეზიდენტი კახა გეწაძე მოჭიდავეთა ნაკრებს მოსკოვში დაგეგმილ მსოფლიო ჩემპიონატზე ვერ გაჰყვა.

როგორც გეწაძემ "ინტერპრესნიუსთან" საუბრისას აღნიშნა, მოსკოვში მისი გამგზავრება პოლიტიკური ნიშნით შეიზღუდა. "იმ მიზეზით, რომ რუსეთში არასასურველი სტუმარი ვარ, "ფე-ეს-ბე"-მ მოსკოვში დაგეგმილ ტურნირზე ჩემი გამგზავრება უკვე მეორედ დაბლოკა. პირველ მსგავს შემთხვევას 2006 წელს ჰქონდა ადგილი. ამჯერადაც იგივე განმეორდა, ოფიციალური მოწვევა და ვიზა დელეგაციის ყველა წევრმა მიიღო, ჩემს გარდა", – განაცხადა ჭიდაობის ფედერაციის პრეზიდენტმა.

მისვე თქმით, მოსკოვში გამგზავრებაში ხელის შეშლას ორი ძირითადი მოტივი ჰქონდა. პირველი ის, რომ ქართველ მოჭიდავეებს ტურნირში წარმატებულ ასპარეზობაში მაქსიმალურად ხელი შეუშალონ და მეორე ის, რომ მან ჭიდაობის მსოფლიო ფედერაციის არჩევნებში არ მიიღოს მონაწილეობა.

გეწაძის განცხადებით, მას მსოფლიო ფედერაციის არჩევნებში მონაწილეობის უფლება აქვს, რუსულმა მხარემ კი ზუსტად იცის, რომ იგი რუსეთის ჭიდაობის ფედერაციის წარმომადგენლებს მხარს არავითარ შემთხვევაში დაუჭერს.

მოსკოვში ჭიდაობის მსოფლიო ჩემპიონატი 6 სექტემბერს გაიხსნება. ჩემპიონატზე უკვე გაემგზავრა ბერძნულ-რომაული სტილით მოჭიდავე 7 სპორტსმენი. თავისუფალი სტილით მოჭიდავეთა 7 წარმომადგენელი კი მოსკოვში 5 სექტემბერს გაემგზავრება.