ლატარიის კომპანიის ჯეკპოტი აფხაზეთიდან დევნილმა ზაირა თორდინავამ მოიგო. იგი ბაგებში, დევნილებით კომპაქტურად ჩასახლებულ კორპუსში ცხოვრობს და ”დელისის” მეტროსთან, ჯიხურში გამყიდველად მუშაობს. მან შეიძინა ერთი ბილეთი და ჯეკპოტი მოიგო .
თორდინავა "ინტერპრესნიუსთან" საუბარში აცხადებს, რომ ახლაც შოკირებულია და კარგა ხანი დასჭირდება ამ ყველაფრის გასააზრებლად.
"ახლაც არ ვარ შოკიდან გამოსული და არ მჯერა, რომ ეს ყველაფერი ჩემს თავს ხდება. მეხუთე ციფრის ამოსვლის შემდეგ, ნერვიულობამ პიკს მიაღწია და გონზე ჯერაც არ მოვსულვარ", - განაცხადა თორდინავამ.
ლატარიის კომპანიაში გამარჯვებულს თანხას დღესვე გადასცემენ. ლატარიის კომპანიის წარმომადგენელი გია ბარკალაია კი აცხადებს, რომ გამარჯვებულს კომპანია ერთი წელი ელოდა.
"ერთი წელი ველოდით გამარჯვებულს. გუშინ 21:51 წუთზე გამოვლინდა გამარჯვებული. ეს არის ყველაზე დიდი თანხა, რაც კი მოუგიათ მთელ კავკასიის რეგიონში", - განაცხადა ბარკალაიამ.
ზაირა თორდინავამ 4 მილიონ 400 ათასი ლარი მოიგო. თანხის 12 პროცენტი დაიბეგრება.