ნატო-ს სამშვიდობო მისიებში ქართული მხარის მონაწილეობის მნიშვნელობაზე ისაუბრეს პარლამენტის თავმჯდომარის მოადგილე, რუსუდან კერვალიშვილმა და ნატო-ს საერთაშორისო სამხედრო შტაბის გენერალ-ლეიტენანტმა, იურგენ ბორნემანმა.

როგორც დღეს გამართული შეხვედრის შემდეგ რუსუდან კერვალიშვილმა ჟურნალისტებს განუცხადა, დღევანდელი შეხვედრა განსაკუთრებული მნიშვნელობის იყო და მასზე რეგიონებისთვის მნიშვნელოვანი საკითხები განიხილეს.

მისი თქმით, საუბარი შეეხო ლისაბონის სამიტზე გაჟღერებულ რუსეთ-საქართველოს საკითხსაც, რომელზეც ითქვა, რომ ორ ქვეყანას შორის ურთიერთობა საქართველოს ტერიტორიული მთლიანობის გათვალისწინებით, ცეცხლის შეწყვეტის შესახებ ხელშეკრულების ფარგლებში უნდა მოგვარდეს.

ამას გარდა, კერვალიშვილმა სტუმართან საუბრისას აღნიშნა, რომ დემოკრატიული განვითარება საქართველოს ჩრდილო ატლანტიკურ ალიანსთან შემდგომ ურთიერთობაში ხელს შეუწყობს.