თბილისის რამდენიმე ქუჩას რუსეთ-საქართველოს ომში დაღუპული ჯარისკაცების სახელი მიენიჭა.

თბილისის საკრებულოს დადგენილებით, დედაქალაქის თერთმეტ ქუჩასა და ერთ სკვერს რუსეთ-საქართველოს ომში დაღუპული თერთმეტი მეომრის სახელი მიენიჭა. კერძოდ, დიღმის მასივში ოთარ შალიკაშვილის სახელობის ხიდთან მდებარე სკვერს ერეკლე ყულოშვილის, ხოლო ვეძისის დასახლებაში მდებარე ზოვრეთის ქუჩას გიორგი სხვიტარიძის სახელი დაერქვა. სახელები გადაერქვა გლდანი-ნაძალადევის რაიონში მდებარე შემდეგ ქუჩებს: სერგო ლაზოს ქუჩას გელა ჭედიას, სტეფანე ლეკიშვილის ქუჩას კი გია რომელაშვილის სახელები მიენიჭა. მუხიანისა და გლდანის I მკრ-ის შემაერთებელ და სამხედრო დასახლებაში მდებარე უსახელო ქუჩებს კი მარატ ნოზაძის და ლერი ლაგურაშვილის სახელები დაერქვა.

ისანი-სამგორის რაიონში მდებარე საბარგო დასახლების პირველ ქუჩას, კახეთისა და სამგორის ჩიხებს, მარელისისა და ქედის კომუნის ქუჩებს,; შესაბამისად, ალექსანდრე თანდაშვილის, რევაზ მამისაშვილის, გიორგი ნადარეიშვილის, ილია ბაბუციძის და შალვა დოლიძის სახელები მიენიჭა.

ქუჩებისათვის დაღუპულ მეომართა სახელების მინიჭებას საკრებულოს დეპუტატებმა ერთხმად დაუჭირეს მხარი.

“25 თებერვალს ჩვენ მოსახლეობას პირობა მივეცით, რომ რამდენიმე ქუჩას რუსეთის აგრესიის შედეგად დაღუპული მეომრების სახელი დაერქმეოდა. დაპირება საკრებულოს პირველივე სხდომაზე ავასრულეთ. ამითი ჩვენ მათი ხსოვნის უკვდავყოფას ჩავუყარეთ საფუძველი”, – აღნიშნა საკრებულოს თავმჯდომარე ზაალ სამადაშვილმა.;;;

საკრებულოს დადგენილებით, ასევე ძველი თბილისის რაიონში, მარიონეტების თეატრის წინ მიმდებარე ტერიტორიას “თეატრის მოედნის” სახელი დაერქვა. სახელი შეეცვალა ასევე ძველ უბანში მდებარე თხინვალის ქუჩას და მას ალპინისტ ზაალ ქიქოძის სახელი ეწოდა.;

თბილისის საკრებულოს გადაწყვეტილებით, დედაქალაქის მერიამ აღნიშნული დადგენილებების შესასრულებლად საჭირო ღონისძიებების განხორციელება ერთი თვის ვადაში უნდა უზრუნველყოს.