დღეს "დედამიწის საათი" აღინიშნება. როგორც "ინტერპრესნიუსს" გარემოს დაცვისა და ბუნებრივი რესურსების სამინისტროდან აცნობეს, საქართველო დღეს შუერთდება მსოფლიო მასშტაბის აქციას "დედამიწის საათი 2011"-ს. ამასთან დაკავშირებით, გარემოს დაცვის სამინისტრო პარტნიორი არასამთავრობო და საერთაშორისო ორგანიზაციების მხარდაჭერით რამდენიმე ღონისძიებას გეგმავს.

რუსთაველის გამზირზე, მოსწავლე-ახალგაზრდობის სასახლესთან კლიმატის ცვლილებისა და ბუნებრივი კატასტროფების თემაზე ფოტოგამოფენა მოეწყობა. გამოფენის პარალელურად გაიმართება კონცერტი. აქციაში, სლოგანით _ "ეს საათი დედამიწისთვის უფრო მეტს ნიშნავს, ვიდრე საათი", მონაწილეობას მიიღებენ გარემოს დაცვის მინისტრი გოგა ხაჩიძე, სამინისტროს საზოგადოებრივი საბჭოს წევრები და "მწვანე კლუბის" სტუდენტები.

20:30-21:30 საათზე, მსოფლიო მასშტაბის აქციასთან დაკავშირებით _ "დედამიწის საათი 2011", ჩაქრება მრგვალი ბაღის მიმდებარე ტერიტორია და გაეროს სახლი. სანთლებისა და გარემოსათვის უსაფრთხო ფარნების შუქზე კი მრგვალ ბაღში თეატრალური წარმოდგენა გაიმართება. ახალგაზრდები გამოსახავენ ამ დღის სპეციალურ ნიშანს "60+". საღამოს მუსიკალურად ჯგუფი "ურსას" გააფორმებს. ღონისძიებაში მონაწილეობას მიიღებენ საქართველოს გარემოს დაცვის მინისტრი გოგა ხაჩიძე, საქართველოს პარლამენტის ვიცე-სპიკერი რუსუდან კერვალიშვილი, გაეროს მუდმივი კოორდინატორი საქართველოში ჯეიმი მაკგოლდრიკი, გაეროს განვითარების პროგრამის (UNDP) ხელმძღვანელის მოადგილე ინიტა პაულოვიჩა.