საქართველოს შინაგან საქმეთა სამინისტრომ ნინო ბურჯანაძისა და მისი შვილის, ანზორ ბიწაძის საუბრების ფარული ჩანაწერი გამოაქვეყნა .
ჩანაწერები მას შემდეგ გავრცელდა, რაც შს სამინისტროში სპეციალური განცხადება გაკეთდა. შს სამინისტროს ინფორმაციით, ბიწაძე და ბურჯანაძე განიხილავენ საკითხს, თუ როგორ უნდა განვითარებულიყო მოვლენები 25 მაისის ღამეს.
განცხადება შოთა უტიაშვილმა გააკეთა. მისი განცხადებით, სახალხო კრების აქციის ორგანიზატორთა ნაწილი მასობრივი არეულობისა და ძალადობის გზით ხელისუფლების შეცვლის გეგმას განიხილავდა.
ამასთან, უტიაშვილის თქმით, ამ დროისთვის აქციის არც ერთი ორგანიზატორი დაკავებული არ არის, თუმცა აქციის დროს ორი ადამიანის დაღუპვის ფაქტზე სისხლის სამართლის საქმე აღძრულია.
ამასთან, როგორც ცნობილია, შს სამინისტრომ უკვე განაცხადა, რომ ორივეს სიკვდილში აქციის ორგანიზატორების, კერძოდ ბიწაძისა და ბურჯანაძის ესკორტს მიუძღვის ბრალი.