დღეიდან ბათუმი-მოსკოვი-ბათუმის მიმართულებით "აირზენას" რეისები შესრულდება.

როგორც "ინტერპრესნიუსს" "აირზენას" საზოგადოებასთან ურთიერთობის სამსახურის უფროსმა ნინო გიორგობიანმა განუცხადა, დღეს 17:30 საათზე თვითმფრინავი ბათუმში მოსკოვიდან ჩაფრინდება, რომელსაც "აირზენას" და აჭარის ტურიზმის სამსახურის წარმომადგენლები დახვდებიან.

მათივე ცნობით, ბათუმიდან მოსკოვში ფრენები სამშაბათობით და კვირაობით იქნება. თბილისიდან მოსკოვში რეისებს კი "აირზენა" ყოველდღეიურად ასრულებს.

ბათუმის რეისის გახსნა ზაფხულის სეზონს უკავშირდება. ივნისის ბოლოს "აირზენა" ბათუმიდან რეისებს თეირანის მიმართულებითაც შეასრულებს. უკვე არის რეისები ბათუმი-თელ-ავივის და ბათუმი-კიევის მიმართულებით, რომელიც ყოველდღიურად სრულდება.

რაც შეეხება ბათუმი-თბილისის რეისს, "აირზენა" მას ყოველდღიურად ასრულებს.