თბილისის საერთაშორისო აეროპორტის DUTY FREE ზონაში, საქართველოს სოფლის მეურნეობის სამინისტროს მხარდაჭერითა და ხელშეწყობით, ქართული ღვინოების მაღაზია გაიხსნება.

როგორც "ინტერპრესნიუსს" თბილისის საერთაშორისო აეროპორტის პრესსამსახურიდან აცნობეს, მაღაზია "საქართველოს ღვინოებს" 205 კვადრატული მეტრი ფართობი დაეთმობა. მაღაზიაში საქართველოს სხვადასხვა რეგიონში არსებული ღვინის კომპანიის მიერ ყურძნის ადგილობრივი ჯიშებისაგან წარმოებული ასზე მეტი სახეობის ღვინის ბრენდი გამოიფინება.

მგზავრებს საქართველოდან გამგზავრებისას არამარტო შესანიშნავი საჩუქრების შეძენის საშუალება მიეცემათ, არამედ იქვე ღვინის დაგემოვნების საშუალებაც ექნებათ. ATU Duty Free -ის მაღალკვალიფიციური გაყიდვების ჯგუფი კი მათ სწორი არჩევანის გაკეთებაში დაეხმარება ამა თუ იმ ღვინის სახეობრივ და არომატულ თვისებებსა თუ შემადგენლობაზე ინფორმაციის მიწოდების სახით.

ღვინოების დაგემოვნება, რასაც რეგულარული ხასიათი ექნება, განაპირობებს მათი გამოცდილებისა და ცოდნის კიდევ უფრო გამდიდრებას ქართული ღვინის ნაირსახეობებში. გარდა ამისა, მაღაზია "საქართველოს ღვინოები" მგზავრებს საშუალებას მისცემს, დააგემოვნონ ქართული ცქრიალა ღვინოების ფართო ასორტიმენტი.

ასევე, ATU Duty Free ქართული ღვინის დახვეწილ კოლექციას ყოველწლიურად 20 მილიონზე მეტ მგზავრს შესთავაზებს სტამბულის საერთაშორისო აეროპორტის Duty Free -ის მაღაზიებში.