მოსკოვის გალერეაში გამოფენილი ფიროსმანის ნახატი "შავი ლომი" შესაძლოა, ორიგინალი არ აღმოჩნდეს . ამის შესახებ "ინტერპრესნიუსს" ფიროსმანის ”შავი ლომის” ორიგინალის კანონიერი მფლობელების, ქუთათელაძეების ადვოკატმა დიმიტრი გაბუნიამ განუცხადა.

მისი ცნობით, იგი მოსკოვში იმყოფებოდა, სადაც ნახატს ექსპერტიზა უნდა ჩაუტარდეს. გაბუნია აღნიშნავს, რომ ექსპერტიზის ჩატარება მას შემდეგ მოითხოვეს, რაც ქუთათელაძეებს გაუჩნდათ ეჭვი, რომ ”შავი ლომი” შესაძლოა, ორიგინალი არ იყოს.

გაბუნიას განმარტებით, იმ შემთხვევაში თუ ექსპერტიზა დაადგენს, რომ ნახატი ორიგინალს არ წარმოადგენს, გამოძიება შეწყდება და დადგება იმ პირების პასუხისმგებლობის საკითხი, რომლებმაც ნახატი გამოფინეს და ორიგინალად გაასაღეს.

"შავი ლომის" გარშემო სკანდალი მას შემდეგ ატყდა, რაც მხატვარმა ყარამან ქუთათელაძემ განაცხადა, რომ ნახატი, რომელიც მოსკოვში იყო გამოფენილი, მისი ოჯახიდან 1993 წელს ყაჩაღურად გაიტაცეს. ნახატის რუსი მფლობელი კი ამტკიცებს, რომ მას ტილო კანონიერად აქვს შეძენილი.