თბილისის სამხატვრო სალონებს გალერეა "აპოლო" შეემატა. როგორც "ინტერპრესნიუსს" გალერეა "აპოლოს" წარმომადგენელმა ნანა ბალავაძემ განუცხადა, ექსპოზიცია დროთა განმავლობაში შეიცვლება.

დღეს კი გალერეაში მე-20 საუკუნის საქართველოში მოღვაწე ცნობილი მხატვრების აქამდე უცნობი ნამუშევრები გამოიფინა. მათ შორისაა ოპერის თეატრის ფარდის, სპექტაკლ "ოტელოს" და კინოფილმ "ქეთო და კოტეს" ესკიზები.

საგამოფენო სივრცე ცალკე აქვს დათმობილი ზურაბ ნიჟარაძის, რობერტ სტურუას, თენგიზ მირზაშვილის, ირაკლი ფარჯიანის, ედმონდ კალანდაძის, პეტრე ბლიოტკინის და ირაკლი ფარჯიანის ნამუშევრებს.

ნანა ბალავაძის ინფორმაციით, გალერეა ახალგაზრდა ნიჭიერ მხატვრებსაც უმასპინძლებს. გალერეა "აპოლოდან" გაყიდული ნამუშევრები აღირიცხება და ყოველი წლის ბოლოს სპეციალურ კატალოგში დაიბეჭდება.

გალერეა "აპოლოს" პრეზენტაციას საზოგადოებისთვის ცნობილი სახეები, ხელოვნებათმცოდნეები და მხატვრები დაესწრნენ.