53-ე სკოლასთან მოსწავლეების დღევანდელი საპროტესტო აქცია დასრულდა
თბილისის 53-ე საჯარო სკოლასთან მოსწავლეების დღევანდელი საპროტესტო აქცია დასრულდა. რამდენიმე საათის განმავლობაში მე-11 კლასელების ნაწილი და მათი მშობლები ორი მოსწავლის სკოლიდან გარიცხვასა და მათ მიმართ ხულიგნობის მუხლით სისხლის სამართლის საქმის აღძვრას აპროტესტებდნენ.
აქცია საკმაოდ ხმაურიანად მიმდინარეობდა, სკოლაში პოლიციის რამდენიმე თანამშრომელიც კი იყო გამოძახებული.
მოსწავლეები და მათი მშობლები ვითარების დაძაბვაში ადანაშაულებენ სკოლის დირექტორ ტარიელ შავშიშვილს. ისინი აცხადებენ, რომ ახლად დანიშნულმა დირექტორმა მიიღო არაადეკვატური გადაწყვეტილება და სკოლის შინაგანაწესის დარღვევისთვის ბავშვები სამართალდამცავ ორგანოს გადასცა.
საპროტესტო აქციას გამოემხაურა სკოლის დირექტორი. როგორც ტარიელ შავშიშვილმა ჟურნალისტებს განუცხადა, საქმეში სამართალდამცავების ჩართვა გამოიწვია მოსწავლეების მხრიდან დირექციისთვის შეურაცხყოფის მიყენებამ. კერძოდ, როგორც შავშიშვილი აცხადებს, მას შემდეგ, რაც მოსწავლეებს აცნობეს სანქციების დაწესების შესახებ, მათ გამოხატეს შეშფოთება, შევიდნენ დირექტორის კაბინეტში და უშუალოდ მას და სკოლის სხვა ხელმძღვანელ პირებს მიაყენეს სიტყვიერი შეურაცხყოფა. ამის შემდეგ სკოლამ გამოიძახა სამართალდამცავები და, როგორც შავშიშვილი აცხადებს, შემდეგი ნაბიჯები სამართალდამცავების გადასაწყვეტია.
გარდა ამისა, სკოლის დირექტორი აცხადებს, ის ორი მისწავლე, რომლებზეც არის საუბარი, სკოლის შინაგანაწესს ხშირად არღვევდნენ.
მშობლებისა და მოსწავლეების პოზიციით კი, მსგავსი ტიპის დასჯა მიუღებელი, არაადეკვატურია და ამის წინააღმდეგ პროტესტის შეწყვეტას არ აპირებენ; ისინი საპროტესტო აქციებს მომავალშიც განაგრძობენ და ბავშვებისთვის ხულიგნობის მუხლით აღძრული საქმის შეჩერებას და სკოლის დირექტორის მოხსნას შემდგომ დღეებშიც მოითხოვენ.
