ირინა სარიშვილი ბიძინა ივანიშვილს რამდენიმე კითხვით მიმართავს
პარტია "იმედის" ლიდერი ირინა სარიშვილი ბიძინა ივანიშვილს რამდენიმე კითხვით მიმართავს.
ირინა სარიშვილს აინტერესებს, გააგრძელებს თუ არა ბიზნესმენი პოლიტიკაში მოსვლის შემდეგ ქველმოქმედებას. სარიშვილი ივანიშვილისაგან მოითხოვს, განმარტოს, რამ განაპირობა მისი გადაწყვეტილება პოლიტიკაში მოსვლის შესახებ.
"მაინტერესებს, სანამ ამ გადაწყვეტილებას მიიღებდა, ჰქონდა თუ არა მას წინასწარ ჩამოყალიბებული გეგმა, თუ ვისთან ითანამშრომლებდა", - აცხადებს სარიშვილი.
"იმედის" ლიდერისათვის მისაღებია ივანიშვილის განცხადებების ძირითადი ნაწილი, თუმცა სარიშვილი ბიზნესმენის განცხადების ფორმას აკრიტიკებს.
"ფორმა განცხადებისა არის აბსოლუტურად მიუღებელი. მაინტერესებს, რამ განაპირობა ბატონი ბიძინასგან ასეთი დემონსტრაციული, შეურაცხმყოფელი ფორმით შეთავაზება საინფორმაციო საშუალებების მიმართ", - აცხადებს სარიშვილი.
მისი განცხადებით, გაუგებარია ასევე, "რესპუბლიკურ პარტიასთან" ივანიშვილის თანამშრომლობის სურვილი.
"ის სამართლიანად ლანძღავს ოპოზიციას, რომ არის სუსტი, მაგრამ "რესპუბლიკელები" სუსტთან ერთად, უვარგისებიც არიან" , - აცხადებს სარიშვილი.
"იმედის" ლიდერის თქმით, ივანიშვილს უნდა გაეთვალა ის პრობლემები, რომელიც მოქალაქეობასთან დაკავშირებით ხელისუფლებისგან შეექმნებოდა.
"მე მაინტერესებს, რასთან გვაქვს საქმე. ამ თემაზე არსებული წინააღმდეგობა ხელისუფლებასა და ბიძინა ივანიშვილს შორის თამაშია, თუ უბრალოდ მოუმზადებლობა", - აცხადებს სარიშვილი.
