ბიძინა ივანიშვილმა რუს გენერალ ალექსანდრე ლებედის დაფინანსებასთან დაკავშირებით განმარტებები დღევანდელ პრესკონფერენციაზე გააკეთა.

საზოგადოებრივი რადიოს ჟურნალისტის  კითხვაზე, როცა აფინანსებდა გენერალ ლებედის საარჩევნო კამპანიას, იცოდა თუ არა, რომ ის იყო გენერალ რადიონოვის სადამსჯელო ოპერაციის ერთ-ერთი ხელმძღვანელი, რომელიც, ამავდროულად, რუსეთის იმპერიის მომხრე იყო, ივანიშვილმა უპასუხა, რომ ის აფინასებდა არა გენერალ ლებედს, არამედ რუსეთის ყოფილი პრეზიდენტის, ბორის ელცინის საარჩევნო კამპანიას.

"მე ვიყავი ერთ-ერთი, რომელიც აფინანსებდა ამ არჩევნებს და მივიჩნევ, რომ ყველაზე გადამწყვეტი და შედეგიანი სვლები გავაკეთე. მოვახერხე ის, რომ კომუნისტებს დაბრუნების საშუალება არ მიეცათ. ელცინის არჩვენების დროს დიდი შესაძლებლობა იყო, რომ კომუნისტები უკან დაბრუნებულიყვნენ", - აღნიშნა მან.

მისივე თქმით, შეეცადა დაერწმუნებინა ელცინის შტაბის წარმომადგენლები, რომ ყველაზე მეტად ლებედს შეეძლო დაებალანსებინა კომუნისტები.

"საბოლოოდ, ჩემი პოზიცია გამართლდა. ბორის ელცინის გამარჯვებით კი საქართველოსაც მიეცა საშუალება უკან აღარ დაბრუნებულიყო. ამ დროს მთელი დემოკრატიული სამყარო, ფარულად თუ ღიად, ბორის ელცინის კანდიდატურას უჭერდა მხარს. აი, აქ ვიდექი მეც", - განაცხადა ივანიშვილმა.