შიდსის შესახებ საზოგადოების ინფორმირების მიზნით, სოციალური მედიის კვლევისა და განვითარების ფონდში შეხვედრა გაიმართა.

შეხვედრაში ჟურნალისტებსა და ბლოგერებთან ერთად შიდსის ცენტრის ექიმი მაია ცინცაძე და ფსიქოლოგი გიორგი წოწკოლაური მონაწილეობდნენ, რომლებიც უშუალოდ აივ-ინფიცირებულებთან მუშაობენ.

როგორც "ინტერპრესნიუსს" შეხვედრის ორგანიზატორმა, გიორგი გიორგაშვილმა განუცხადა, ღონისძიების მიზანია, ბლოგერების, როგორც ყველაზე აქტიური ინტერნეტმომხმარებლებისა და ჟურნალისტების მეშვეობით საზოგადოების სწორი ინფორმირება შიდსის შესახებ.

შიდსის ცენტრის ექიმის, მაია ცინცაძის განცხადებით, 1-ელი დეკემბერი შიდსთან ბრძოლის საერთაშორისო დღეა, რომლის ერთ-ერთი მთავარი დატვირთვაა, გაიზარდოს სამოქალაქო საზოგადოების ინფორმირებულობა. "კერძოდ, მნიშვნელოვანია, საზოგადოებას კიდევ ერთხელ მიეწოდოს ინფორმაცია, რა ხდება დღეს მსოფლიოში, საქართველოში, როგორი მდგომარეობაა სტატისტიკურად, თუ როგორ გადადის ეს დაავადება და როგორ ავიცილოთ თავიდან ინფიცირება", - აღნიშნა მაია ცინცაძემ.