შოთა რუსთაველის სახელობის თეატრში დღეს იტალიური მუსიკა და არგენტინული ტანგოს ჰანგები აჟღერდება .

როგორც "ინტერპრესნიუსს" იტალიის საელჩოდან აცნობეს, შოთა რუსთაველის სახელობის თეატრში იტალიელი საქსოფონისტი, ფედერიკო მონდელჩი კონცერტს გამართავს.

ფედერიკო მონდელჩი საქართველოს სიმფონიერ ორკესტრთან ერთად, მაესტრო ნიკოლოზ რაჭველის ხელმძღვანელობით შეასრულებს ენიო მორიკონეს, ნინო როტას, ნიკოლა პიოვანის, რობერტო მოლინელის და ასტორ პიაცოლას ნაწარმოებებს.

მუსიკოსს კონცერტები გამართული აქვს იტალიისა და უცხოეთის ყველაზე ცნობილ ორკესტრებთან ერთად, მათ შორის ლა სკალას ფილარმონიულ ორკესტრთან ერთად და მაესტრო სეიჟი ოზავას ხელმძღვანელობით.

აღსანიშნავია, რომ ისეთი რანგის მუსიკოსი, როგორიცაა ნიკოლა პიოვანი, სპეციალურად მონდელჩისთვის ქმნის მუსიკალურ კომპოზიციებს.

კონცერტი ორგანიზებულია იტალიის საელჩოსთან თანამშრომლობითა და კერძო სპონსორების დახმარებით.