აფხაზეთის დე ფაქტო რესპუბლიკის ე.წ. პრეზიდენტმა, ალექსანდრე ანქვაბმა თათბირი გამართა, სადაც გალის რაიონში სიტუაციის გამწვავების საკითხი განიხილეს, - ამის შესახებ აფხაზურ მედიას ე.წ. უშიშროების საბჭოს მდივანმა სტანისლავ ლაკობამ განუცხადა.

მისი თქმით, გალის რაიონში ბოლო პერიოდში ადგილობრივი სამართალდამცავების წინააღმდეგ ტერორისტული აქტები ხორციელდება.

"უკვე არის არც თუ ისე მცირე მსხვერპლი. როგორც წესი, კლავენ ქართული წარმოშობის ადამიანებს, რომლებიც აფხაზეთის მთავრობასთან თანამშრომლობენ, რაც დემონსტრაციულად კეთდება. სიტუაცია განსაკუთრებით 2011 წლის ბოლოსკენ დაიძაბა და ვითარება დღითიდღე მწვავდება", - განაცხადა ლაკობამ.

მისივე თქმით, ყველა კვალი საქართველოს მთავრობის მიერ კონტროლირებად ტერიტორიაზე მიდის, "საიდანაც შემოდიან ტერორისტული ჯგუფები". "როგორც წესი, ტერაქტები ჟენევის დისკუსიების წინ ხდება, რომ თქვან, თითქოს აფხაზეთის მთავრობა და რუსი მესაზღვრეები ვერ აკონტროლებენ ვითარებას", - განაცხადა სტანისლავ ლაკობამ.

მან კიდევ ერთხელ გაიხსენა ქართული ოპოზიციის წარმომადგნლების განცხადება, რომ სამეგრელოში ხელისუფლება უკანონო შეიარაღებულ ფორმირებებს ქმნის. "აღსანიშნავია, რომ პრაქტიკულად ამ პერიოდს ემთხვევა იმ ქართველი ტერორისტების პატიმრობიდან გათავისუფლება, რომლებიც აფხაზეთში ედუარდ შევარდნაძის დროს მოქმედებდნენ, რომელთაც სააკაშვილის გაპრეზიდენტების შემდეგ, გრძელვადიანი პატიმრობა ჰქონდათ მისჯილი", - აღნიშნა ე.წ. უშიშროების საბჭოს მდივანმა.