პარტია "თავისუფალი საქართველო" საპატიმროებში წამების ფაქტებზე საუბრობს. ამასთან დაკავშირებით დღეს პარტიის პოლიტიკურმა მდივანმა, თენგიზ ომანიძემ განცხადება გაავრცელა.

ომანიძის თქმით, საპროტესტო აქციაზე დაკავებულ ახალგაზრდებს საპატიმროებში აწამებდნენ. საქმე ეხება 29 მაისს რუსთაველის გამზირზე საპროტესტო აქციის მსვლელობისას დაკავებულ 8 ახალგაზრდას, რომელთაგან ნაწილს სასამართლომ 30-დღიანი პატიმრობა შეუფარდა. დაკავებულები რამდენიმე დღის წინ გათავისუფლდნენ პატიმრობიდან.

"გათავისუფლების შემდეგ, ყოფილი პატიმრები ყვებიან, რომ მათ მიმართ საპატიმროებში ადგილი ჰქონდა წამების და ღირსების შემლახავი მოპყრობის ფაქტებს. ხორციელდებოდა ფიზიკური და ფსიქოლოგიური ზეწოლა", – აცხადებს ომანიძე.

პარტია "თავისუფალი საქართველო" მომხდართან დაკავშირებით სახალხო დამცველს, უფლებადამცველ ორგანიზაციებს და დიპლომატიურ კორპუსს დაუყოვნებლივი რეაგირებისკენ მოუწოდებს და სასჯელაღსრულების, პრობაციისა და იურიდიულ საკითხთა მინისტრის, ხათუნა კალმახელიძის პასუხისმეგბლობის საკითხის დაყენებას მოითხოვს.