ბათუმის პიაცაზე დღეს ვალერი მელაძის კონცერტი გაიმართება. პიაცას მოედანზე მოსამზადებელი სამუშაოები მიმდინარეობს. როგორც ღონისძიების ორგანიზატორმა დავით ოქიტაშვილმა აღნიშნა, კონცერტი საქველმოქმედოა და შემოსული თანხა ბავშვთა სახლის აღსაზრდელებს მოხმარდება.

"მოსამზადებელი სამუშაოები თითქმის მთავრდება. დამატებით სკამები ჩავდგით, რადგან ბევრი ადამიანი უბილეთოდ დარჩა და არ გვინდა ვინმეს ვაწყენინოთ. არ მახსოვს ასეთი აჟიოტაჟი ყოფილიყოს რომელიმე კონცერტზე. ბათუმის პიაცაზე 3500 ადამიანს ველოდებით", - აღნიშნა დავით ოქიტაშვილმა.

პიაცაზე კონცერტი 21:00 საათზე დაიწყება. ოქიტაშვილის განცხადებით, ვალერი მელაძე მაყურებელს ბევრ სიურპრიზს უმზადებს. "კონცერტი მიეძღვნება საქართველოს კათოლიკოს-პატრიარქს, უწმინდესს და უნეტარეს ილია მეორეს, რადგან 2 აგვისტო ილიაობაა, მისი მფარველი აგელოზის დღე. ეს საღამო ყველასათვის დასამახსოვრებელი იქნება. ვალერი მელაძე დიდ სიურპრიზებს უმზადებს პიაცაზე შეკრებილ მსმენელს", - განაცხადა დავით ოქიტაშვილმა.

კონცერტზე დასასწრები ბილეთების ფასი 30-80 ლარია.