ომი უნდოდა ყველას, რუსეთსაც და საქართველოსაც, მაგრამ 2008 წლის აგვისტოში ომი საქართველომ დაიწყო, - ამის შესახებ დიმიტრი სანაკოევის მთავრობის ყოფილმა წარმომადგენელმა ურუზმაგ ქარქუსოვმა განაცხადა.

ქარქუსოვი ონში "ქართული ოცნების" აქციაზე იმყოფებოდა. მისივე თქმით, მხარს უჭერს "ქართულ ოცნებას". ქარქუსოვი დარწმუნებულია, რომ "ქართული ოცნება" გაიმარჯვებს, რადგან ქვეყანაში უმრავლესობა უმუშევარია და გაჭირვებულია.

ქარქუსოვის განცხადებით, ონში იმყოფება იმიტომ, რომ სიკეთეს და სამართლიანობას უჭერს მხარს.

ურუზმაგ ქარქუსოვი 2006-2010 წლებში დიმიტრი სანაკოევის ადმინისტრაციის თანამშრომელი, შემდეგ კი ეკონომიკისა და მდგრადი განვითარების მინისტრის მოადგილე იყო. ამასთან, მისი ძმა ჯემალ ქარქუსოვი სანაკოევის ადმინისტრაციაში შს მინისტრი იყო. იქ მუშაობდა მისი კიდევ ერთი ძმა იანიკ ქარქუსოვიც.

2008 წლის საქართველო-რუსეთის ომის შემდეგ ჯემალ და იანიკ ქარქუსოვები რუსეთში გაიქცნენ. ურუზმაგ ქარქუსოვი კი 2010 წლამდე ეკონომიკის მინისტრის მოადგილე იყო.