თბილისის მე-13 საერთაშორისო კინოფესტივალს კინოთეატრები "ამირანი" და "რუსთაველი" უმასპინძლებს. კინოფესტივალი 3-9 დეკემბერს გაიმართება, რომლის ორგანოზატორია კინოხელოვნების ცენტრი "პრომეთე".

თბილისის საერთაშორისო კინოფესტივალი ტრადიციულად, დეკემბრის დასაწყისში იმართება და კინოეკრანები ერთი კვირის განმავლობაში ეთმობა საფესტივალო, არაკომერციულ, ნოვატორულ, ექსპერიმენტულ, საავტორო თუ ე.წ. განსხვავებულ კინოს.

ორგანიზატორების განმარტებით, კინოფესტივალის მთავარი მიზანია, წარმოადგინოს მსოფლიო და ქართული კინემატოგრაფის საუკეთესო ნამუშევრები, მაყურებელს გააცნოს ახალი, მაღალი მხატვრული ღირებულების მქონე კინოპროდუქცია და ხელი შეუწყოს ქართული კინოინდუსტრიის განვითარებას.

ფესტივალის ფარგლებში გაიმართება პროფესიული შეხვედრები, უორკშოფები, მასტერკლასები, რეტროსპექტივები და სხვა ინდუსტრიული ღონისძიებები, რაც, ორგანიზატორების განცხადებით, სტიმულს მისცემს ახალგაზრდა კინემატოგრაფისტების ნიჭისა და შემოქმედებითი ხედვის განვითარებას.

"ჩვენ ვისწრაფით, რომ კინოფესტივალი სამხრეთ კავკასიაში რეჟისორების, პროდიუსერების, გაყიდვების აგენტების და კინოდისტრიბუტორების თავშეყრის ადგილი გახდეს. თავისი არსებობის მანძილზე ფესტივალმა საერთაშორისო მასშტაბით დიდი მნიშვნელობა შეიძინა. წლიდან წლამდე მატულობს ფესტივალზე ფილმის წარდგენისა და მონაწილეობის მსურველთა რაოდენობა",-აცხადებენ ფესტივალის ორგანიზატორები.

გასული 12 წლის მანძილზე ფესტივალმა 500-მდე რეჟისორს, მსახიობს, პროდიუსერს, კინომცოდნეს და სხვა პროფესიონალს უმასპინძლა.

ამ წლების განმავლობაში ფესტივალის სტუმრები იყვნენ ისეთი ცნობილი კინომოღვაწეები, როგორებიც არიან: ბობ რაფელსონი, მაიკლი, ფრანკო ნერო, ლეოს კარაქსი, კშიშტოფ ზანუსი, მიკა კაურისმეკი, ბრუნო დიუმონი, ჰიუ ჰადსონი, მარიამ დ’აბო, გრეტა სკაკი, ჩულპან ხამატოვა, ჯაფარ პანაჰი და სხვები.

ფესტივალის მთავარი პარტნიორია ბერლინის საერთაშორისო კინოფესტივალი. ფესტივალის ორგანიზატორებს მუდმივად უწევენ კონსულტაციას ბერლინალეს "ფორუმის" დამაარსებლები ერიკა და ულრიხ გრეგორები, აგრეთვე სხვა საერთაშორისო კინოფესტივალების დირექტორები, ცნობილი მსახიობები, პროდიუსერები და ამ სფეროს აღიარებული პროფესიონალები.

კინოფესტივალი თანამშრომლობს ისეთ საერთაშორისო გამოცემებთან, როგორიცაა Hollywood Reporter da Screen Daily.