თბილისის მე-13 საერთაშორისო კინოფესტივალის ფარგლებში, ეროვნულმა არქივმა კინოთეატრ "რუსთაველში" უხმო კინოს პერიოდში გადაღებული ოთხი მოკლემეტრაჟიანი ფილმის ჩვენება გამართა.

როგორც "ინტერპრესნიუსს" არქივიდან აცნობეს, ფილმები ცოცხალი მუსიკით რეზო კიკნაძემ და ანსამბლმა "Consilia"-მ გააფორმეს.

არქივის წარმომადგენელთა ინფორმაციით, გასული საუკუნის 20-30-იან წლებში გადაღებულმა ნამუშევრებმა მაყურებელთა დიდი დაინტერესება გამოიწვია და ჩვენებამ ანშლაგით ჩაიარა.

ფესტივალისთვის შერჩეული იყო ფილმები "კულტურფილმის" ჟანრიდან, რომელსაც კონცეფცია "სხეული/მანქანა" აერთიანებს.

ფილმებიდან ორი - კოტე მიქაბერიძისა და ვასილ დოლენკოს "რასაც დასთეს, იმას მოიმკი" და სიკო დოლიძის "მიწის ძახილი" ახალგაზრდა სოციალისტური რესპუბლიკისთვის აქტუალურ თემას, კოლექტიურ მეურნეობებში სამუშაო პროცესის მექანიზაციას და შრომის ახლებურ განაწილებას ეხება.

ვახტანგ შველიძის "კოლმეურნის ჰიგიენა" და ალექსანდრე ჯალიაშვილის "დილის ათი წუთი" კი სხეულის გაჯანსაღების საკითხებში სახელმწიფო პოლიტიკას ასახავს.