ვანო სარაჯიშვილის სახელობის თბილისის კონსერვატორიის დიდ დარბაზში დღეს ნოდარ ანდღულაძის 85 წლის იუბილესადმი მიძღვნილი კონცერტი გაიმართება.

როგორც "ინტერპრესნიუსს" კონსერვატორიიდან აცნობეს, საიუბილეო კონცერტში მონაწილეობას ზურაბ სოტკილავა, მაყვალა ქასრაშვილი, ლადო ათანელი, ბადრი მაისურაძე, ელდარ გეწაძე, ნინო სურგულაძე, ქეთევან ქემოკლიძე, თეა დემურიშვილი, რამაზ ჩიკვილაძე, მარიკა მაჩიტიძე, არმაზ დარაშვილი, ვახტანგ ჯაშიაშვილი მიიღებენ.

კონცერტზე დაუკრავს თბილისის ოპერისა და ბალეტის სახელმწიფო თეატრის სიმფონიური ორკესტრი დავით მუქერიას დირიჟორობით.

ღონისძიების ორგანიზატორია ლადო ათანელის საერთაშორისო საქველმოქმედო ფონდი "თანადგომა".

ქართველი მომღერალი, საქართველოს სახალხო არტისტი, ნოდარ ანდღულაძე 1927 წლის 13 დეკემბერს დაიბადა.