თსუ-ს ბიბლიოთეკას დღეს, მარო მაყაშვილის საოჯახო რელიკვიები გადაეცემა. როგორც "ინტერპრესნიუსს" ივანე ჯავახიშვილის სახელობის თბილისის სახელმწიფო უნივერსიტეტიდან აცნობეს, საქართველოს დამოუკიდებლობის დღესთან დაკავშირებით, უნივერსიტეტის ბიბლიოთეკას დამოუკიდებლობისათვის ბრძოლაში დაღუპული თსუ-ს სტუდენტის მარო მაყაშვილის საოჯახო რელიკვიები გადმოეცემა.

ამასთან, ღონისძიების ფარგლებში, თბილისის სახელმწიფო უნივერსიტეტის პოლიტიკურ და სოციალურ მეცნიერებათა ფაკულტეტის სტუდენტები და ახალგაზრდა მკვლევარები საქართველოს პირველი დემოკრატიული რესპუბლიკის დაფუძნების 95 წლისთავისადმი მიძღვნილ საჯარო განხილვას გამართავენ.

შეხვედრაზე სტუდენტები დემოკრატიული რესპუბლიკის დამფუძნებელი კრების ქალი დეპუტატების და იმ მოღვაწეთა (ნოე ჟორდანია, ნოე რამიშვილი, ნიკოლოზ (კარლო) ჩხეიძე, ირაკლი (კაკი) წერეთელი, აკაკი ჩხენკელი, გიორგი ლასხიშვილი, სპირიდონ კედია, ზურაბ ავალიშვილი) პოლიტიკურ პორტრეტებს წარმოადგენენ, რომლებმაც დემოკრატიული რესპუბლიკის განვითარების ძირითადი ასპექტები განსაზღვრეს.