კულტურის სამინისტროში ხვალ კულტურული მემკვიდრეობის მართვის პოლიტიკის კონცეფციის პრეზენტაცია გაიმართება. როგორც "ინტერპრესნიუსს" კულტურის სამინისტროდან აცნობეს, დოკუმენტზე "იკომოს-საქართველო" ევროკავშირის დაფინანსებით მუშაობს.

დოკუმენტში ერთ-ერთ მთავარ პუნქტად გაწერილი იქნება რეკომენდაციები კულტურული მემკვიდრეობის მართვის დეცენტრალიზაციისთვის, რომლის შესრულებისას სფეროს მწვავე საკითხები დარეგულირდება და საერთაშორისო კონვენციის ჩარჩოებში მოექცევა.

კონცეფციას ევროკავშირის აღმოსავლეთ პარტნიორობის კულტურის პროგრამის ფარგლებში მიმდინარე პროექტი "რეგიონული თანამშრომლობა კულტურული მემკვიდრეობის განვითარებისთვის" წარმოადგენს, რომელზეც მომხსენებლი "იკომოს-საქართველოს" გენერალური მდივანი ნატო ცინცაბაძე იქნება.

პრეზენტაციას დაესწრებიან: საქართველოს კულტურისა და ძეგლთა დაცვის მინისტრი გურამ ოდიშარია, მინისტრის პირველი მოადგილე მარინე მიზანდარი, საქართველოს რეგიონული განვითარებისა და ინფრასტრუქტურის მინისტრის პირველი მოადგილე თენგიზ შერგელაშვილი, ფინანსთა მინისტრის პირველი მოადგილე გიორგი თაბუაშვილი, ეკონომიკისა და მდგრადი განვითარების მინისტრის პირველი მოადგილე დიმიტრი ქუმსიშვილი, საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი მერაბ ბოჭოიძე და ევროკავშირის წარმომადგენელი საქართველოში ოლივერ რაისნერი.