თბილისის საქალაქო სასამართლომ სს "ქართული ფოლადის" სარჩელი ნაწილობრივ დააკმაყოფილა. როგორც სასამართლოს მიერ გავრცელებულ განცხადებაშია ნათქვამი , "ქართულ ფოლადსა" და შპს "რუსთავის ფოლადს" შორის 2011 წლის 27 დეკემბერს დადებული აქტივების ნასყიდობის ხელშეკრულება ბათილად იქნა ცნობილი, თუმცა მოპასუხეებისთვის 7 780 000 ლარის დაკისრების მოთხოვნა არ დაკმაყოფილდა.

"სს "ქართული ფოლადის" დირექტორი ითხოვდა, ბათილად ცნობილიყო სს "ქართულ ფოლადსა" და შპს "რუსთავის ფოლადს" შორის 2011 წლის 27 დეკემბერს დადებული აქტივების ნასყიდობის ხელშეკრულება, აღდგენილიყო პირვანდელი მდგომარეობა და აღნიშნული გარიგებით შპს "რუსთავის ფოლადისთვის" გადაცემული უძრავ-მოძრავი ქონება დაბრუნებოდა სს "ქართული ფოლადს", ამასთან, მოპასუხეებს სს "ქართული ფოლადის" სასარგებლოდ დაკისრებოდათ 7 780 000 ლარის გადახდა ზიანის ანაზღაურების სახით. სასამართლოს გადაწყვეტილებით, "ქართული ფოლადის" დირექტორის სარჩელი დაკმაყოფილდა ნაწილობრივ. კერძოდ, ბათილად იქნა ცნობილი სს "ქართულ ფოლადს" და შპს "რუსთავის ფოლადს" შორის 2011 წლის 27 დეკემბერს დადებული აქტივების ნასყიდობის ხელშეკრულება. ამასთან, აღდგენილ იქნა პირვანდელი მდგომარეობა და აღნიშნული ხელშეკრულებით შპს "რუსთავის ფოლადისთვის" გადაცემული ქონება საკუთრებაში დაუბრუნდა სს "ქართული ფოლადს". ხოლო, "ქართული ფოლადის" სარჩელი ირაკლი მეძმარიაშვილის და მალხაზ ალბორაშვილის მიმართ 7 780 000 ლარის დაკისრების შესახებ მოთხოვნის ნაწილში არ დაკმაყოფილდა", - აღნიშნულია სასამართლოს განცხადებაში.