საქარველოს გაერთიანებული სამელიორაციო სისტემების კომპანია კასპის მუნიცილალიტეტში, თეძამის ხეობაში, მდინარე თეძამზე წყალსაცავის მოწყობას გეგმავს.

სოფლის მეურნეობის მინისტრის მოადგილე დავით შერვაშიძემ და საქართველოს გაერთიანებული სამელიორაციო სისტემების კომპანიის დირექტორის მოადგილე დიმიტრი კავთუაშვილმა დღეს ის ტერიტორია დაათვალიერეს, სადაც თეძამის წყალსაცავი მოეწყობა.

წყალსაცავის მოსაწყობად წინასაპროექტო სამუშაოები უკვე დაწყებულია. წყალსაცავი 12 მლნ კუბური მეტრი მოცულობის იქნება და წყლით უზრუნველყოფს სიონის მაგისტრალურ არხს; ჩოჩეთის არხს; ნიაბის ზედა არხს; ყარაღაჯის არხს; წაბლა არხს და მეტეხის არხს. ეს არხები კასპის მუნიციპალიტეტის 2600 ჰექტარ სასოფლო-სამეურნეო მიწის ფართობის სარწყავად გამოიყენება.

წყალსაცავის მოწყობა კომპანიის 2014-2017 წლის გეგმაშია გაწერილი. მშენებლობა მომავალ წელს დაიწყება და 2 წელს გაგრძელდება. წყალსაცავების მოწყობას კომპანია საქართველოს სხვადასხვა რეგიონებშიც გეგმავს.