ბარნოვის ქუჩაზე მდებარე 53-ე საჯარო სკოლაში ასაფეთქებელი მოწყობილობის არსებობა არ დადასტურდა. როგორც "ინტერპრესნიუსის" კორესპონდენტი 53-ე საჯარო სკოლის მიმდებარე ტერიტორიიდან იტყობინება, გამნაღმველებმა შენობაში მუშაობა უკვე დაასრულეს.

სკოლის დირექტორის მარიამ რამინაშვილის ინფორმაციით, 10:05 საათზე საპატრულო პოლიციის წარმომადგენლებმა სკოლის ევაკუაცია მოითხოვეს.

დირექტორის ინფორმაციით, ზუსტად 7 წუთში 1 800 მოსწავლის ევაკუაცია მოხერხდა, რის შემდეგაც, დაახლოებით საათნახევრის განმავლობაში გამნაღმველები მუშაობდნენ. საბოლოოდ, შენობაში ნაღმის არსებობა არ დადასტურდა.

დირექტორის ინფორმაციით, სკოლაში სასწავლო პროცესი ჩაიშალა, რადგან გამნაღმველებმა 24 საათის განმავლობაში სასწავლო პროცესის შეწყვეტის რეკომენდაცია მისცეს.

ამასთან, განაღმვითი სამუშაოები დასრულდა პეტრიაშვილის ქუჩაზე 21-ე და ბაქოს ქუჩაზე მდებარე 24-ე საჯარო სკოლებში, სადაც ასაფეთქებელი მოწყობილობა არ აღმოჩნდა.

იხილეთ ვიდეო: ევაკუაცია თბილისის სამ სკოლაში - ასაფეთქებელი მოწყობილობის არსებობა არ დადასტურდა