რუსთავის დრამატული თეატრის წინ გიგა ლორთქიფანიძის ვარსკვლავი გაიხსნა
რუსთავის დრამატულ თეატრს ცნობილი ქართველი რეჟისორის, გიგა ლორთქიფანიძის სახელი მიენიჭა და მისივე სახელობის ვარსკვლავი გაიხსნა.
ღონისძიებას რეჟისორის მეუღლე ქეთევან კიკნაძე, და მარიამ ლორთქიფანიძე, ოჯახის სხვა წევრები და ახლობლები, თეატრალური საზოგადოების წარმომადგენლები, მსახიობები და რეჟისორები დაესწრნენ.
გიგა ლორთქიფანიძის ვარსკვლავის გახსნას საქართველოს საგარეო საქმეთა მინისტრი მაია ფანჯიკიძე, კულტურის მინისტრის მოადგილე მანანა ბერიკაშვილი, პარლამენტარები ნუკრი ქანთარია, დიმიტრი ჯაიანი, ცენტრალური და ადგილობრივი ხელისუფლების სხვა წარმომადგენლებიც ესწრებოდნენ.
თეატრის ფოიეში გიგა ლორთქიფანიძის ცხოვრებისა და შემოქმედების ამსახველი ფოტოების გამოფენა გაიმართა.
გიგა ლორთქიფანიძის ვარსკვლავი რეჟისორის შვილიშვილმა, პატარა გიგა ლორთქიფანიძემ გახსნა, რის შემდეგაც რუსთავის გიგა ლორთქიფანიძის სახელობის თეატრში რეჟისორის შემოქმედების ამსახველი თეატრალიზებული წარმოდგენა და კონცერტი გაიმართა.
გიგა ლორთქიფანიძემ მარჯანიშვილის თეატრიდან წამოსულ ახალგაზრდა მსახიობებთან ერთად რუსთავში 1967 წლის ნოემბერში თეატრი დააარსა და 1979 წლამდე მისი სამხატვრო ხელმძღვანელი და რეჟისორი იყო.
გიგა ლორთქიფანიძის სახელობის ვარსკვლავი რუსთავის ხელისუფლების ინიციატივით გაიხსნა.
