საქართველოს კალათბურთის ეროვნული ნაკრების წევრმა, გიორგი შერმადინმა კლუბი გამოიცვალა. მიმდინარე სეზონში ესპანურ "სარაგოსაში" მოთამაშე შერმადინი კარიერას ევროპის ერთ-ერთ გრანდში, ევროლიგის მოქმედ ჩემპიონ "ოლიმპიაკოსში" გააგრძელებს, სადაც 2012-13 წლების სეზონში გამოდიოდა.

როგორც საქართველოს კალათბურთის ფედერაციის ვებგვერდზე განთავსებულ ინფორმაციაშია ნათქვამი, თუკი გასულ სეზონში ქართველ ცენტრს ბერძნულ გრანდში ნაკლები სათამაშო დრო ჰქონდა, ახლა ის გუნდს ერთ-ერთ ლიდერად უბრუნდება.

"პიროსელები ევროლიგის მეორე ჯგუფურ ეტაპზე არიან და ცენტრის პოზიციის გასაძლიერებლად სწორედ ქართველი ცენტრი შეიგულეს, რომელმაც საკუთარი შესაძლებლობები ესპანეთის მძლავრ ლიგაში კარგად წარმოაჩინა. შერმადინის "ოლიმპიაკოსში" გადასვლის ამბავი ევროპაში სატრანსფერო ფანჯრის დახურვამდე რამდენიმე საათით ადრე გადაწყდა. "სარაგოსას" ხელმძღვანელები ქართველი ლეგიონერის გასხვისებას გვარიანი საკომპენსაციო თანხის სანაცვლოდ დათანხმდნენ, რის შემდეგაც საბოლოო სიტყვა თავად კალათბურთელმა თქვა", - აცხადებენ კალათბურთის ფედერაციაში.

მათივე ინფორმაციით, საბოლოოდ ფინანსური დეტალები არ გახმაურებულა, თუმცა ელექტრონულ მედიაში გამოქვეყნდა, რომ ბერძნები შერმადინს კონტრაქტს მიმდინარე სეზონის ბოლომდე სთავაზობდნენ, მას კი 1,5-წლიანი ხელშეკრულება სურდა.

მხარეები შეთანხმდნენ, რომ შერმადინს "ოლიმპიაკოსში" კონტრაქტი სეზონის ბოლომდე ექნება. ქართველი კალათბურთელი პირეოსში 27 თებერვალს ჩავა და გუნდში პირველ ვარჯიშს ჩაატარებს.

ბერძნულ გრანდს ევროლიგის მე-2 ეტაპზე შექმნილ E ჯგუფში 4 მოგება და 3 მარცხი გააჩნია და იტალიურ "მილანთან" და მარადიულ მეტოქე ათენის "პანათაინაიკოსთან" ერთად მეორე-მეოთხე ადგილებს იყოფს.

ცნობისთვის, მეოთხედფინალში E და F ჯგუფების ოთხ-ოთხი საუკეთესო გადის.

საბერძნეთის ჩემპიონატში "ოლიმპიაკოსს" 19 ტურის შემდეგ 17 გამარჯვება აქვს და "პანათინაიკოსს" ერთი მოგებით ჩამორჩება. პიროსელებს მომდევნო მატჩი 1-ელ მარტს ელით, როდესაც პატრასში მეშვიდეადგილოსან "აპოლონს" ესტუმრებიან. შერმადინის დებიუტი კი, სავარაუდოდ, 28 თებერვალს, ევროლიგაში შედგება, როცა "ოლიმპიაკოსი" სტამბოლში "ფენერბაჰჩეს" ესტუმრება.