ადვოკატი ირაკლი ზაქარეიშვილი შალვა თათუხაშვილის გვამზე ჩატარებულ ექსპერტიზასთან დაკავშირებით პროკურატურის მიერ გაკეთებული განცხადებით "შეძრწუნებულია".

"შეძრწუნებული ვარ იმით, რაც მოვისმინე. უფრო მიმყარდება ეჭვი, რაც მქონდა. მთავარი პროკურატურა გაეცნო რა ალტერნატიული ექსპერტიზის დასკვნას, შეეცადა ღამის საათებში მოეპოვებინა სხვა ექსპერტიზის დასკვნა და წარმოგვიდგინა რადიკალურად სხვა მოცემულობა", - განაცხადა ზაქარეიშვილმა "ტელეიმედის" გადაცემა "რეაქციაში".

ამასთან, მან საზოგადოებას კიდევ ერთხელ გააცნო მისი დაკვეთით დამოუკიდებელი ექსპერტის მიერ ჩატარებული დასკვნის შედეგები და აღნიშნა, რომ ამ დასკვნის მიხედვით, თათუხაშვილს გვამზე მყარი და ბლაგვი საგნით მიყენებული ჭრილობები აღენიშნება. "ეს არის სრული სიყალბე, რაც მოვისმინეთ", - დასძინა ზაქარეიშვილმა.