კოალიცია "ქართული ოცნების" საარჩევნო შტაბის პრესსპიკერი გიორგი გეგეჭკორი იქნება, - ამის შესახებ კოალიცია "ქართული ოცნების" საარჩევნო შტაბის ხელმძღვანელმა, ვიცე პრემიერმა, კახი კალაძემ დღეს გამართულ ბრიფინგზე განაცხადა.

კახა კალაძის თქმით, დღეიდან კოალიციის საარჩევნო შტაბი სრულად არის მობილიზებული. ამასთან, ქვეყნის მასშტაბით უკვე გახსნილია 74 საარჩევნო შტაბი.

"ჩვენს მიერ შემოთავაზებული კანდიდატები იქნებიან შედეგზე ორიენტირებული, გამჭვირვალე, პასუხისმგებლიანი, ანგარიშვალდებულნი და კანონმორჩილი მმართველები, რომელთა მთავარ ღირებულებას წარმოადგენს ადამიანი, მთავარ ამოცანას კი - მოქალაქის მსახურება. დღეიდან კოალიციის საარჩევნო შტაბი სრულად არის მობილიზებული. ქვეყნის მასშტაბით გახსნილია და სრული დატვირთვით მუშაობს 74 საარჩევნო შტაბი. ამასთან, დღესვე მინდა წარმოგიდგინოთ ცენტრალური საარჩევნო შტაბის პრესპიკერი გიორგი გეგეჭკორი", – განაცხადა კახა კალაძემ და დასძინა, რომ ის მიმართავს ამომრჩევლებს და მოუწოდებს მათ მაქსიმალური ჩართულობისკენ.

გიორგი გეგეჭკორი ყოფილი პრემიერ-მინისტრ ბიძინა ივანიშვილის მრჩეველი იყო.