საქართველოს იუსტიციის სამინისტროს მონაცემთა გაცვლის სააგენტომ მოქალაქის პორტალზე (MY.GOV.GE) ახალი ელექტრონული სერვისების ინტეგრაცია დაასრულა.

როგორც "ინტერპრესნიუსს" მონაცემთა გაცვლის სააგენტოდან აცნობეს, დღეიდან ყველა დაინტერესებულ მომხარებელს პორტალის მეშვეობით შესაძლებლობა აქვს საკუთარი ან სხვა პიროვნების სტატუსი აღსრულების ეროვნული ბიუროს მოვალეთა რეესტრში გადაამოწმოს.

მათივე ინფორმაციით, აღნიშნული სერვისით სარგებლობისთვის მომხმარებელმა სისტემაში რეგისტრაციის შემდეგ უნდა აირჩიოს სექცია "მოვალეთა რეესტრი".

"თუ აღნიშნული პიროვნება არ არის რეგისტრირებული მოვალეთა რეესტრში, სისტემა მომენტალურად გამოიტანს შესაბამის შეტყობინებას, ხოლო თუ მომხმარებელს სურს ამავე რეესტრში სხვა პიროვნების სტატუსის გადამოწმება, ამისათვის საჭიროა შეივსოს "მოვალის ინფორმაციის საძიებო ფორმა", - განმარტავენ მონაცემთა გაცვლის სააგენტოში.

მათივე ინფორმაციით, მოქალაქის პორტალი MY.GOV.GE წარმოადგენს ონლაინ რესურსს, რომელშიც თავმოყრილია სახელმწიფო და კერძო სტრუქტურების ელექტრონული სერვისები.

"მომხმარებელს საშუალება აქვს მსოფლიოს ნებისმიერი ქვეყნიდან, სახლიდან ან ოფისიდან გაუსვლელად დისტანციურად, ონლაინ რეჟიმში, რამდენიმე მარტივი კომბინაციის განხორციელებით ისარგებლოს სახელმწიფო სტრუქტურების ელექტრონული სერვისებით და მნიშვნელოვნად დაზოგოს როგორც დრო, ისე ფინანსური რესურსები", - განმარტავენ მონაცემთა გაცვლის სააგენტოში.

მათივე ინფორმაციით, მოქალაქის პორტალით MY.GOV.GE სარგებლობისთვის მომხმარებელს შეუძლია გამოიყენოს როგორც ახალი პირადობის მოწმობა, ისე მომხმარებლის სახელი და პაროლი, რომლის დარეგისტრირებაც ერთჯერადი პროცედურის გავლით იუსტიციის სახლებშია შესაძლებელი.

მოქალაქის პორტალზე მომხმარებელი რამდენიმე მარტივი კომბინაციის განხორციელებით მიიღებს სხვადასხვა სახის მომსახურებას - იქნება ეს პიროვნებასთან (პასპორტი, სხვადასხვა სახის მოწმობები, გვართან დაკავშირებული საინტერესო ინფორმაცია), ქონებასთან, სოციალურ მომსახურებასთან, ჯანდაცვასთან ან ბიზნესის წამოწყებასთან დაკავშირებული პროცედურები თუ კომუნალური, სხვადასხვა სახის ჯარიმებისა და სხვა გადასახდელების გადახდა.

მოქალაქის პორტალის მეშვეობით მომხმარებელს ასევე შეუძლია სხვადასხვა სახელმწიფო დაწესებულებიდან ელექტრონულად გამოითხოვოს საჯარო ინფორმაცია და პასუხიც პორტალზევე მიიღოს.

ამასთან, როგორც სააგენტოში განმარტავენ, მოქალაქის პორტალზე ყველა ელექტრონული სერვისი შესაბამისი კატეგორიების მიხედვითაა დალაგებული, რაც ამარტივებს სასურველის არჩევას. მომხმარებელს ასევე შესაძლებლობა აქვს მისთვის საჭირო ყველა ის მომსახურება, რომელსაც ხშირად იყენებს, საკუთარი შეხედულებისამებრ განათავსოვს პირად გვერდზე. დღეისათვის პორტალზე განთავსებულია 70-ზე მეტი ელექტრონული მომსახურება.